“პოლიციის ნაკბენი მაქვს” – 19 ნოემბერს აქციაზე დაკავებული

მელიქიშვილის გამზირზე მშვიდობიანი პროტესტისას დაკავებული 3 მოქალაქე ზაჰესის იზოლატორიდან რამდენიმე წუთის წინ გაათავისუფლეს. ჯერჯერობით მათი სასამართლო პროცესი ჩანიშნული არაა.სამოქალაქო აქტივისტები აცხადებენ, მათი დაკავებისას გამოიყენეს ფიზიკური ძალადობა, რომელიც დაკავების შემდეგ ავტომობილშიც გრძელდებოდა.

“როცა გაკავებენ და მერე როდესაც გამოდიხარ ამ ჯურღმულიდან ყველაზე კარგად გრძნობ თავისუფლებას და თურმე რისთვის იბრძვი ადამიანი და თურმე რა სწორ მხარეს დგახარ. რაც შეეხება დაკავებას,  საშინლად ამაზრზენი ადამიანები იყვნენ. დაკავებისას როდესაც აქცევ ადამიანს და შემდეგ ფეხებით დგები და წაქცეულზე კბენ, ეს არის რაღაც სასწაული, პოლიციის ნაკბენი მაქვს,”  – აცხადებს “კოალიცია ცვლილებისთვის” პოლიტსაბჭოს წევრი მანუჩარ ჩაჩანიძე.

გამოძიება სამოქალაქო აქტივისტების მიმართ 173-ე  მუხლით მიმდინარეობს, რაც პოლიციის ბრძანების დაუმორჩილებლობას და წვრილმან ხულიგნობას გულისხმობს. ოპოზიციას და სამოქალაქო აქტივისტებს ობიექტური სასამართლოს მოლოდინი არ აქვთ.