შემოქმედის თემში, სასწავლო წლის დაწყებამდე რამდენიმე დღით ადრე, გაიმართა პირველკლასელთა გაცნობითი შეხვედრა, რომელშიც მონაწილეობდნენ თემის სამი სკოლის, გომის, კვირიკეთისა და შემოქმედის პედაგოგები, ბავშვები და მათი მშობლები.
წლევანდელი შეხვედრა განსხვავებული ფორმატით ჩატარდა – თემის სამივე საჯარო სკოლის პირველკლასელები ერთ სივრცეში გაერთიანდნენ. შეხვედრის მიზანი იყო, რომ ბავშვებს, მშობლებსა და მასწავლებლებს ერთმანეთთან მეტი ურთიერთობა ჰქონოდათ და სასწავლო პროცესის დაწყება უფრო მარტივად და ნაკლები ემოციური ბარიერებით შემდგარიყო.
შეხვედრის ფარგლებში, შემოქმედის საჯარო სკოლის დაწყებითი საფეხურის პედაგოგმა, მანანა მექვაბიშვილმა, ბავშვებისთვის სახალისო აქტივობები და თამაშები ჩაატარა, რაც მათ ახალი გარემოსთან შეგუებას შეუწყო ხელს.
„ეს ძალიან მნიშვნელოვანი ინიციატივაა, რადგან ბავშვები ერთმანეთს ეცნობიან, მშობლები კი მასწავლებლებს და პროცესის მონაწილეებს. ეს ყველაფერი სასწავლო პროცესის დაწყებამდე ბარიერების დაძლევაში გვეხმარება. ძალიან ჭკვიანი და მონდომებული ბავშვები არიან. ბევრ სახალისო და შემეცნებით გაკვეთილებს ვპირდები ჩემს პირველკლასელებს. გულს დასაწყვეტია ის, რომ ყოველ წელს პირველკლასელების რაოდენობა იკლებს და ეს ძალიან მადარდებს,“ – აღნიშნა მანანა მექვაბიშვილმა, რომელიც უკვე 50 წელია პედაგოგად მუშაობს.
ტრადიცია არც წელს დაირღვა – კომპანია „პარვუს ჯგუფმა“, რომელიც თემში ენერგეტიკულ საქმიანობას ეწევა, პირველკლასელებს საჩუქრად სასწავლო ბარათები გადასცა. როგორც კომპანიის სოციალური პროექტების ხელმძღვანელმა, სოფო ვასაძემ აღნიშნა, განათლების მხარდაჭერა კომპანიის პრიორიტეტია:
„პირველკლასელებისთვის წიგნის ვაუჩერების ჩუქება ერთგვარი გზავნილია – განათლება და ცოდნა ყოველთვის ყველაზე ძლიერი საძირკველი იქნება მომავლის შესაქმნელად. გვიხარია, რომ წლიდან წლამდე ეს ტრადიცია გრძელდება და ახალ თაობას წიგნებთან ახლოს ყოფნას ვუსურვებთ, პროექტის მიზანია, ერთი მხრივ, მოსწავლეების მოტივაციის ამაღლება, მეორე მხრივ კი – ახალი თაობების რეგისტრაციის გაზრდა თემის სკოლებში. წარმატებულ სასწავლო წელს ვუსურვებ სამივე სკოლას და განსაკუთრებით ჩვენს პირველკლასელებს, რადგან ეს მათთვის ცხოვრების ძალიან მნიშვნელოვანი ეტაპია.“
Loading ...