როგორც ელექტრონულ, ასევე არაელექტრონულ პირადობის მოწმობებზე შესაძლოა, მამის სახელისა და ეროვნების აღმნიშვნელი გრაფები დაბრუნდეს.
აღნიშნულის შესახებ პარლამენტს წინადადებით მიმართა მოქალაქე ლელა ქავთარაძემ. პარლამენტის ბიურომ საკანონმდებლო ორგანოს იურიდიულ საკითხთა კომიტეტს აღნიშნული წინადადების განხილვა დაავალა.
„გთხოვთ, როგორც ელექტრონულ, ასევე არაელექტრონულ მოწმებების მომზადებისას, ასევე სამოქალაქო სააქტო ჩანაწერებში შეიტანოთ ცვლილება და დააბრუნოთ მამის სახელი და ეროვნების განმსაზღვრელი გრაფა – ჩანაწერი, სადაც გარკვევით დაფიქსირებული იქნება ნებისმიერი პირის ეროვნება, როგორც ეს გასულ 1998-2004 წლამდე ფიქსირდებოდა, რათა ჩვენი წარმომავლობის „ქართველობის სამუდამო გაქრობა – გადაგვარება არ მოხდეს“, როგორც ამას ბატონი გურამ შარაძე ბრძანდება“, – წერს მოქალაქე საკანონმდებლო წინადადებაში.
შეგახსენებთ, საქართველოს მოქალაქის პირადობის დამადასტურებელი მოწმობის, ასევე დროებითი და მუდმივი ბინადრობის, დროებითი საიდენტიფიკაციო ელექტრონული მოწმობის დიზაინი 2025 წლის 4 ივნისიდან იცვლება. აღსანიშნავია ისიც, რომ ამ კონკრეტულ თარიღამდე გაცემული ძველი დიზაინის მოწმობები, ძალაში ვადის გასვლამდე იქნება. მოქალაქე ლელა ქავთარაძე მიმართავს პარლამენტს, რომ განახლებულ პირადობის მოწმობებში მამის სახელისა და ეროვნების შეტანაც განხორციელდეს.
Loading ...