რუსეთის ფედერაციის პრეზიდენტის პრესსპიკერი დმიტრი პესკოვი ამერიკის შეერთებულ შტატებში უკრაინის პრეზიდენტის ვიზიტსა და თეთრ სახლში ზელენსკი-ბაიდენის შეხვედრის დროს გაკეთებულ განცხადებებს გამოეხმაურა.
პესკოვმა თქვა, რომ ორი ლიდერის შეხვედრაზე რეალურად მშვიდობისკენ არანაირი მოწოდება არ ყოფილა.
ამასთან, პესკოვმა აღნიშნა, რომ კრემლს არ გაუგია სიტყვები უკრაინისა და შეერთებული შტატების პრეზიდენტებისგან იმის შესახებ, რომ მზად არიან რუსეთის ფედერაციის შეშფოთებას მოუსმინონ.
„არ იყო რეალური მოწოდებები მშვიდობისაკენ! არ იყო გაფრთხილებები დონბასში საცხოვრებელი კორპუსების ბარბაროსული დაბომბვის შესახებ“, – აცხადებს პესკოვი.
შეგახსენებთ, უკრაინის პრეზიდენტი ვოლოდიმირ ზელენსკი 21 დეკემბერს შეერთებულ შტატებში გაემგზავრა. მან თეთრ სახლში შეხვედრა გამართა პრეზიდენტ ჯო ბაიდენთან, ის ასევე შეხვდა სახელმწიფო მდივან ენტონი ბლინკენს.
გარდა ამისა, ზელენსკი კონგრესში სიტყვითაც გამოვიდა. მან ამერიკელ ხალხს გაწეული დახმარებისთვის მადლობა გადაუხადა.
ზელენსკიმ კონგრესში სიტყვით გამოსვლისას თქვა, „თქვენი ფული არ არის ქველმოქმედება, ეს ინვესტიციაა გლობალურ უსაფრთხოებაში.“
Loading ...