პარფიუმერია-კოსმეტიკის ნაწარმი, რომელშიც ტყვია აღმოჩნდა

თბილისის სხვადასხვა მაღაზიებში შეძენილ პარფიუმერია-კოსმეტიკის პროდუქტებში მცირე ოდენობით ტყვია აღმოჩნდა. ამის შესახებ ინფორმაციას, „სტრატეგიული კვლევებისა და განვითარების ცენტრი“ (momxmarebeli.ge) ავრცელებს.

კერძოდ, მათი ცნობით, თბილისის სხვადასხვა მაღაზიაში შეძენილი 42 დასახელების პარფიუმერიულ-კოსმეტიკური ნაწარმიდან 3 ნიმუშში მცირე ოდენობით ტყვია აღმოჩნდა, ხოლო 3 ნიმუშზე ეტიკეტირების წესები იყო დარღვეული – პროდუქტები შეიცავდა პარაბენებს (ნორმის ფარგლებში), მაგრამ ეს ეტიკეტზე არ იყო აღნიშნული. 6 ნიმუშში კი შესამოწმებელი პარამეტრების ზუსტი ოდენობების განსასაზღვრად დამატებითი კვლევა გახდა საჭირო, რის შედეგებსაც ცენტრი მოგვიანებით გამოაქვეყნებს.

ამასთან, ცენტრის ცნობით, შემოწმების მიზნით შეიძინეს – სხვადასხვა ქვეყანაში, სხვადასხვა ფირმის მიერ წარმოებული პროდუქცია, რომელიც ხელმისაწვდომია მოქალაქეებისათვის, ესენი იყო: შამპუნები, შხაპის გელები, ბალზამები, ანტიპერსპირანტები და სხვა. 

ცენტრის ინფორმაციით, იმ ნაწარმის ჩამონათვალი, სადაც, ტყვია და ეტიკეტირების დარღვევა გამოვლინდა, ასე გამოიყურება:

• კრემ-დეოდორანტი “ინჯოი” – აღმოჩნდა ტყვია;
• შხაპის გელი “ნივეა სპა” – აღმოჩნდა ტყვია;
• ფიტო დეოდორანტი “ჩისტაია ლინია” – აღმოჩნდა ტყვია;
• თხევადი საპონი “თეო” – ეტიკეტირების დარღვევა;
• თმის აღმდგენი ბალზამი “ჯენერა – ეტიკეტირების დარღვევა;
• კონდიციონერი “ვატიკა” – ეტიკეტირების დარღვევა;

„საქართველოში პარფიუმერიულ-კოსმეტიკური ნაწარმის უსაფრთხოების მოთხოვნები 2001 წელს დამტკიცებული ნორმატიული აქტითაა განსაზღვრული, რომელშიც ბოლო 18 წლის განმავლობაში ერთი ცვლილებაც კი არ შესულა და არ არის გათვალსიწინებული პარფიუმერიულ-კოსმეტიკური ნაწარმის უსაფრთხოებისადმი თანამედროვე მსოფლიოში არსებული მიდგომები. ამავე დროს, პარფიუმერიულ-კოსმეტიკური ნაწარმის მაკონტროლებელი უწყება – სახელმწიფო სანიტარიული ზედამხედველობის სამსახური ჯერ კიდევ 2000-იანი წლების შუაში გაუქმდა. ამ პირობებში, რთული სათქმელია, რამდენადაა შესაძლებელი ზემოაღნიშნულ ნორმატიულ აქტზე დაყრდნობა. მიუხედავად ამისა, აღსანიშნავია, რომ ამ ბრძანების მიხედვითაც პარფიუმერიულ-კოსმეტიკურ ნაწარმშში ტყვია იკრძალება,“-აღნიშნულია ცენტრის ინფორმაციაში.

იხილეთ კვლევა სრულად: https://www.momxmarebeli.ge/articles/all/6745?fbclid=IwAR0aEH4TZ4m2ulODcpQPRNRmFPiu70n28op4OW1p9V3lB1_RIGbdwX4DQWo

www.bpn.ge