პარლამენტის შენობაში სპეცრაზმია მობილიზებული _ "ცეცხლსასროლი იარაღი არცერთ სპეცრაზმელს არ აქვს"

ამ წუთებში პარლამენტის შენობაში და მის მიმდებარე ტერიტორიაზე სპეცრაზმია მობილიზებული.

როგორც გავარკვიეთ, სპეციალური აღჭურვილობით შეიარაღებული სპეცრაზმის წევრები უმაღლეს საკანონმდებლო ორგანოში ავტობუსებით წუხელ შეიყვანეს.

ისინი პარლამენტის თავმჯდომარის კაბინეტთან და სასესიო დარბაზთან არიან განლაგებულნი.

თბილისის საპატრულო პოლიციის უფროსის ვაჟა სირაძის თქმით, სპეცრაზმი უსაფრთხოებისთვის არის პარლამენტში და მის მიმდებარე ტერიტორიაზე და გავრცელებული ინფორმაცია იმის შესახებ, რომ მათ ცეცხლსასროლი იარაღიც აქვთ სიმართლეს არ შეესაბამება.

_ რომ არ მოხდეს სიტუაციის გამწვავება, კანონის დარღვევა პარლამენტში და მის მიმდებარე ტერიტორიაზე განთავსებულია საპოლიციო ძალები. ისინი საზოგადოების უსაფრთხოებას იცავენ. ცეცხლასროლი იარაღი არცერთ სპეცრაზმელს არ აქვს,  _ აღნიშნა სირაძემ

ჟურნალისტებთან საუბრისას.

შეგახსენებთ, რომ სამოქალაქო მოძრაობის და გაერტიანებული ოპოზიციის საპროტესტო აქცია პარლამენტის წინ 15 საათზე დაიწყება.

პარალელურად, აქციისთვის ემზადება პატრიოტთა ალიანსი, რომელთა მიერ ორგანიზებული აქცია რესპუბლიკის მოედანზე 17 საათზე უნდა დაიწყოს და როგორც აქციის ერთ-ერთი ორგანიზატორი ირმა ინაშვილი ამბობს, ისინი არავისთან შეერთებას არ აპირებენ.