პარლამენტთან დღისით დაკავებული ორი დემონსტრანტი გამოუშვეს

მათ დაახლოებით საღამოს 11 საათისათვის დატოვეს იზოლატორი.

მანამდე შსს-ის პრესცენტრში რადიო თავისუფლებას განუცხადეს, რომ ორივე მათგანი დააკავეს ადმინისტრაციულ სამართალდარღვევათა კოდექსის 173-ე მუხლით, რაც პოლიციელისადმი დაუმორჩილებლობას გულისხმობს.

გაიმართება მათი დაკავების შესახებ სასამართლო სხდომაც.

დაკავებისას დემონსტრანტები ტროტუარზე იდგნენ და აპროტესტებდნენ მუშაობას პარლამენტში „ქართული ოცნების“ მიერ შექმნილი დროებითი საგამოძიებო კომისიისა, რომელიც ცდილობს, 2008 წლის აგვისტოს ომში წინა ხელისუფლების ბრალეულობა დაადგინოს.

ერთ-ერთ დაკავებულს, თაკო კურატიშვილს, 9 აპრილის ქუჩაზე, პარლამენტის გვერდით მდებარე ტროტუარზე, ხელში საპროტესტო პლაკატი ეჭირა წარწერით: „ანწუხელიძე უკვდავია“.

ამ დროს მასთან მოულოდნელად მივიდა რამდენიმე პოლიციელი და დააკავა.

მისი დახსნა ორმა აქტივისტმა სცადა, რომელთაგან ერთ-ერთი, ლილუ შაველაშვილი, პოლიციამ იქვე დააკავა.

www.radiotavisupleba.ge