„პარვუს ჯგუფისა“ და შემოქმედის სკოლის ერთობლივი კონფერენცია ენერგიის თემას მიეძღვნა

სსიპ- აკაკი სურგულაძის სახელობის ოზურგეთის მუნიციპალიტეტის სოფელ შემოქმედის საჯარო სკოლაში 2025 წლის 04 ივნისს გაიმართა მოსწავლეთა მე-3 სასწავლო-შემოქმედებითი კონფერენცია თემაზე – „ენერგია – უხილავი და ხილული, მეცნიერებასა და ყოფა-ცხოვრებაში“.

ინფორმაციას ამის შესახებ შემოქმედის საჯარო სკოლა ავრცელებს.

„ჩვენი სკოლის გუნდმა კონფერენციების ორგანიზებისა და ჩატარების დადებითი გამოცდილება დააგროვა. ზედიზედ მესამე წელია სასწავლო წლის ბოლოს ვაჯამებთ სამეცნიერო-შემოქმედებითი კონფერენციით, რომლისთვისაც  თემებს  საგანგებოდ ვარჩევთ. საკონფერენციო თემა უნდა უკავშირდებოდეს სკოლის მისიასა და მიზნებს, მოსწავლეთა ინტერესებსა და თემის საჭიროებებს.  წელს არჩევანი მდგრადი განვითარების მიზნებზე შევაჩერეთ, კერძოდ ენერგიაზე. არჩევას ხელი შეუწყო შპს „პარვუს ჯგუფმა“, რომელიც სოფელ გომის მიმდებარე ტერიტორიაზე, მდინარე ბჟუჟზე აშენებს მცირე ჰესებს და სხვა პროექტებთან  ერთად მხარს უჭერს საგანმანათლებლო პროექტებს. მათი მხარდაჭრით სკოლის მოსწავლეებს, საკვირაო სკოლის ფორმატში,  რეგულარულად უტარდებოდათ ტრენინგები, შეხვედრები, ექსკურსიები.

კონფერენციისთვის მზადება  2-3 თვის განმავლობაში მიმდინარეობს. პირველ ყოვლისა კონფერენციის დებულებას ვაცნობთ საგნობრივ კათედრებსა და მოსწავლეებს. მოსწავლეები ინტერესების მიხედვით ერთიანდებიან საგნობრივ გუნდებში. გუნდებს მენტორობას უწევენ საგნის მასწავლებლები. საკონფერენციო თემებიდან გამომდინარე იგეგმება და ეწყობა თემატური ექსკურსიები, ტარდება მცირე კვლევები, იწერება ინტერვიუები. მოსწავლეები მოიპოვებენ, ეცნობიან, ახარისხებენ და ამუშავებენ საჭირო მასალას საკონფერენციო თემებისთვის. ამზადებენ პრეზენტაციებს და წარუდგენენ ფართო აუდიტორიას.

საკონფერენციოდ წელს 12 თემა მომზადდა11 სხვადასხვა დისციპლინაში. განვიხილეთ ენერგია სხვადასხვა ჭრილში, ფიზიკის, მათემატიკის, ქიმიის ბიოლოგიის, სპორტის, კვების, ადამიანის ფსიქოლოგიის კუთხით და სხვა. მთავარი თემა განახლებადი ენერგიები, მათი გონივრული გამოყენება და მოხმარება იყო. კონფერენციაში მონაწილეობდა 32 მოსწავლე და 11 მასწავლებელი. მოსწავლეებმა ჩაატარეს კვლევა, წარმოადგინეს თავიანთი ხელით შექმნილი მოდელები, დამსწრეების თვალწინ ჩაატარეს ექსპერიმენტები. კონფერენციის დასასრულს სტუმრებისა და სკოლის წარმომადგენლების ჩართულობით გაიმართა პანელური დისკუსია თემაზე – „არაფორმალური განათლება და სასკოლო გამოწვევები“. კონფერენციაზე წარმოდგენილი თემები დამსწრე საზოგადოებისათვის იყო საინტერესო და მრავალფეროვანი.

შემოქმედის საჯარო სკოლის დირექცია მადლობას უხდის სკოლის ყველა თანამშრომელს მხარდაჭერისთვის. განსაკუთრებულ მადლობას კი – ქალბატონ ნონა სულამანიძეს, რომელმაც საკონფერენციო სივრცე გაგვილამაზა.

კონფერენციის მხარდამჭერი გახლდათ შპს „პარვუს ჯგუფი“