პაატა იმნაძე – პიკი ნამდვილად გადავიარეთ, მაგრამ ეს არ ნიშნავს, რომ უნდა მოვეშვათ, ნუ დაგვავიწყდება, დღეში კორონავირუსის 1 000 ახალი შემთხვევა გვაქვს

დაავადებათა კონტროლის ეროვნული ცენტრის ხელმძღვანელის მოადგილის პაატა იმნაძის თქმით, საქართველოში კორონავირუსის გავრცელების პიკური პერიოდი გადავლილია.

„კორონავირუსის მესამე ტალღის პიკი ნამდვილად გადავიარეთ“, – აღნიშნა იმნაძემ.

როგორც პაატა იმნაძემ საქართველოს პირველი არხის გადაცემაში „დღის თემა“ განაცხადა, პიკის გადავლა დამშვიდების საფუძველს არ იძლევა და რეკომენდაციების სათანადოდ დაცვა კვლავაც აუცილებელია.

„მართალია, პიკი გადავიარეთ, მაგრამ ნუ დაგვავიწყდება, რომ დღეში კორონავირუსის 1 000 შემთხვევა გვაქვს. საქართველო ჯერ კიდევ ოცეულშია იმ ქვეყნების ჩამონათვალში, სადაც ყველაზე მაღალია 100 ათას მოსახლეზე ავადობა. ასე რომ, ჯერ ისეთი ვითარებაც არ არის, რომ მორჩა კორონა და მოვეშვათ. მესმის, დაცხა, ძნელია გარე სივრცეში პირბადით სიარული, მაგრამ, რა ვქნათ, სხვა გზა არ არის. ყველას უნდა გვესმოდეს, რომ 1000 ადამიანი რომ ავად ხდება, ეს ნიშნავს, რომ 10 მაინც გარდაიცვლება. ეს არ უნდა დავივიწყოთ“, – აღნიშნა პაატა იმნაძემ.