„ოცნების“ ოფისთან აქციაზე აქტივისტები და პარტიის ახალგაზრდული ორგანიზაციის წევრები ერთმანეთს დაუპირისპირდნენ

„ქართული ოცნების“ ოფისთან მიმდინარე აქციისას „გაბედეს“ აქტივისტებსა და „ქართული ოცნების“ ახალგაზრდული ორგანიზაციის წევრებს შორის დაპირისპირება იყო.

გავრცელებული ინფორმაციით, ერთ-ერთმა ახალგაზრდამ „გაბედეს“ წევრს სიტყვიერი შეურაცხყოფა მიაყენა, რასაც შეხლა-შემოხლა და ხმაური მოჰყვა. 

სამართალდამცველებმა დაპირისპირებული მხარეები ადგილიდან გაიყვანეს. საპროტესტო აქცია კი გრძელდება.

მანამდე აქტივისტებმა მმართველი პარტიის ოფისის წინ მდებარე ღობესა და ასფალტზე წარწერები: „ზონდერი“ და „ქურდული ოცნება“ დატოვეს. 

„ქართული ოცნების“ ოფისთან მოძრაობის „გაბედე“ აქცია ტარდება. „რამდენს ბედავ“, – ამ სახელწოდების აქცია მცხეთაში აქტივისტების დაკავებას მოჰყვა. 

მცხეთაში, მაჟორიტარ დიმიტრი ხუნდაძის ოფისთან, ფიზიკური დაპირისპირების დროს შინაგან საქმეთა სამინისტრომ 7 ადამიანი დააკავა, მათ შორის ოთხი, მოძრაობა „გაბედეს“ აქტივისტია. დაკავებულთა შორის არის შალვა ნათელშვილის შვილიც. 

დიმიტრი ხუნდაძე ერთ-ერთია იმ მაჟორიტარ დეპუტატებს შორის, რომელმაც პროპორციულ არჩევნებზე გადასვლას მხარი არ დაუჭირა. პროპორციულის ჩაგდებას თბილისსა და სხვა ქალაქებში საპროტესტო აქციები მოჰყვა.

imedinews.ge