ოფშორი, ონშორი და საერთაშორისო ბიზნესის კულუარები – ლაშა ჩხაიძის რუბრიკა

ოფშორში საბანკო ანგარიშის გახსნა სრულიად ლეგალურია და საერთაშორისო ბიზნეს აქტივობებში ჩასართავად კომპანიებს ეკონომისტები სწორედ ასეთი ანგარიშის გახსნას ურჩევენ. სიტყვა “ოფშორ“-ში იგულისხმება, რომ ანგარიშის მფლობელი იმ ქვეყნის მაცხოვრებელი არ არის, სადაც ბანკის ანგარიში გახსნა.

ოფშორულ ქვეყნებად ხშირად კუნძულოვანი სახელმწიფოები გვევლინებიან. მსგავსი ტიპის მომსახურებას კომპანიები თუ კერძო პირები იმიტომ ეტანებიან, რომ მათ აქაური საფინანსო ინსტიტუტები სთავაზობენ ნაკლებ რეგულაციას, დეპოზიტის დაცულობას და ნაკლებ საგადასახადო პროცენტს. მშვენივრად ჟღერს მდიდარი კაცის ყურისთვის.

როდესაც ბიზნესმენი საკუთარი ქვეყნის გარეთ ეწევა საქმიანობას, მისთვის იოლია ოფშორული კომპანიის მეშვეობით მიიღოს მონაწილეობა  ქვეყნის ეკონომიკაში და მასში ინვესტიცია ჩადოს. ქართული ვალუტის მაგალითით რომ ვიხელმძღვანელოთ, ლარის არასტაბილურობა ბიზნესისთვის უსიამოვნო რეალობაა, საერთაშორისო კომპანიის ანგარიშზე არსებული უცხოური ვალუტით განხორციელებული ოპერაციები კი ფინანსურ რისკებს ამცირებს და ეს მნიშვნელოვანი ფაქტორია, რადგან ოფშორულ კომპანიას ქართულ ბაზარზე შეუძლია უცხოური ვალუტით განახორციელოს ეკონომიკური აქტივობები. მათ აქვთ ფუფუნება, არ იღელვონ, თუ რამდენია ხვალ ლარის კურსი დოლართან მიმართებაში. ფუფუნებაა ისიც, რომ ბიზნესმენს საკუთარი კაპიტალი უცხოურ ანგარიშზე აქვს განთავსებული და მისი ქვეყნის მთავრობას არ ხელეწიფება, ადვილად გაუყინოს ანგარიშები. განვითარებულ ქვეყნებში არსებობს მინიმალური საათობრივი ანაზღაურება,  8, 9, 10 დოლარი, ზოგან მეტი. ოფშორში დაფუძნებულ კომპანიას კი საშუალება აქვს ბევრად ნაკლები გადაუხადოს თანამშრომლებს და ბიზნესი თანხას ასე ზოგავს. ოფშორის  მომხმარებელი ცნობილი კომპანიები არიან Apple და Microsoft.

მიუხედავად იმისა, რომ ნებისმიერი უცხოური ბანკის ანგარიშის ქონა უკვე ოფშორია, ეს სიტყვა რამდენიმე კუნძულოვანი სახელმწიფოს სინონიმად იქცა, ესენია თუნდაც კაიმანის, ბაჰამის და ბერმუდის კუნძულები. პანამა, ბელიზი, შვეიცარია, ჰონგ კონგი და ირლანდია ასევე პოპულარული ოფშორული ფინანსური ცენტრები არიან.

ოფშორში ანგარიშის გახსნა მარტივია, ამისთვის პასპორტი, ნოტარიულად დამტკიცებული საბანკო ამონაწერი და მისამართი დაგჭირდებათ. ქვეყნების მთავრობები და სერიოზული საბანკო ორგანიზაციები არალეგალურ ფინანსურ მაქინაციებს მკაცრად ებრძვიან და ფულის გადარიცხვის დროს გამჭვირვალეობას ითხოვენ.საბანკო ანგარიშის გახსნა ხშირად ფასიანია და ბევრ ბანკს მინიმალური დეპოზიტის ოდენობაც განსაზღვრული აქვს.

დაბალი გადასახადების გამო პოპულარულ ოფშორულ ქვეყნებს საგადასახადო სამოთხეს უწოდებენ. კონფიდენციალურობა მათთვის უმთავრეს ღირებულებას წარმოადგენს, ისევე, როგორც კაპიტალის დაცვა, მოქნილი ბიუროკრატიული მექანიზმი, მინიმალური რისკები და ზრდის პოტენციალი.

ჩვენს ძვირფას მკითხველს ალბათ კარგად მოეხსენება და ვერც დავუმალავთ იმ ფაქტს, რომ ოფშორში ყველაფერი კანონიერად არ ხდება, რაც ყოველთვის მნიშვნელოვანი მახასიათებელია, როგორც კი დიდი ფული იწყებს მიმოქცევას. საუბარია შემოსავლების დამალვაზე, გადასახადებისგან თავის არიდებაზე, ფულის გათეთრებასა და მსგავს უკანონო ურთიერთობებზე.

ცნობილი ფაქტია, რომ კონფიდენციალურობის დაცვის საბაბით, შვეიცარიული ბანკები კლიენტების სახელებსა და გვარებს არ იყენებდნენ მათი ანგარიშების მართვისას. არც ისე დიდი ხანია გასული, რაც ეს ბანკები დათანხმდნენ პირობას, სხვა ქვეყნების მთავრობებს გადასცენ მათი კლიენტების მონაცემები, როცა საქმე შეეხება საგადასახადო დანაშაულის ნიშნებს. შვეიცარიის მსგავსად, ბევრი ქვეყნის იურისდიქცია მორგებული იყო კონფიდენციალურობის პრინციპის დაცვაზე, თუმცა ახლანდელი ტრენდი მეტ გამჭვირვალობას ითვალისწინებს.

იმ ხალხისთვის, ვისაც საკუთარი შემოსავლების აფიშირება არ უყვარს, ყველაზე მეტად უსიამოვნოა კაპიტალის შესახებ ანგარიშის ჩაბარება საერთაშორისო საშემოსავლო სამსახურისთვის.

ოფშორის(Offshore) ანტონიმია  და საპირისპიროს ნიშნავს ონშორი(Onshore), ამ დროს კომპანია ფლობს ადგილობრივ საბანკო ანგარიშებს იმ ქვეყანაში, სადაც მისი ბიზნესი ოპერირებს. ჩვენის მხრიდან გირჩევდით, ოფშორული ანგარიშის გახსნისას მიმართოთ კვალიფიციურ ბროკერს, რადგან შანსი იმისა, რომ არაკეთილსინდისიერ ბანკირს გადაეყაროთ, არც ისე დაბალია.