თურქეთში, მარმარილოს ზღვის სანაპიროდან დაახლოებით 150 მეტრით უკან დახევის მიზეზი ოფიციალურად გახდა ცნობილი. ექსპერტების განმარტებით, ეს ვითარება რეგიონისთვის ნორმალური მეტეოროლოგიური მოვლენაა და არ უნდა განიხილებოდეს, როგორც ძლიერი მიწისძვრის მომასწავებელი მოვლენა. ინფორმაციას თურქული მედია ავრცელებს.
ოფიციალური პირების ინფორმაციით, მარმარილოს რეგიონი ზღვის დონის ვარდნას პერიოდულად განიცდის, განსაკუთრებით გაზაფხულზე და შემოდგომის თვეებში. მათ ხაზგასმით აღნიშნეს, რომ ამ ფენომენის მეცნიერული ახსნა ატმოსფერული წნევის ცვლილებაა.
“მაღალი წნევა, რომელიც დიდი ხნის განმავლობაში აქტიური იყო ბალკანეთზე და დაბალი წნევა სამხრეთ-აღმოსავლეთ ხმელთაშუა ზღვაზე, ისევე როგორც ქარის თანმდევი მოძრაობა, იწვევს ზღვის ზედაპირის სიმაღლეში ცვლილებებს. ამ მიზეზით სრულიად ბუნებრივია, რომ გარკვეულ პერიოდებში ზღვა უკან იხევს“. – აღნიშნულია ოფიციალურ განცხადებაში.
ექსპერტებმა აღნიშნეს, რომ ზღვის უკან დახევა მიწისძვრასთან პირდაპირ კავშირში არ არის და მოქალაქეებს ნერვიულობის მიზეზი არ აქვთ.
ცნობისთვის, თურქეთში, ზღვამ სანაპიროდან დაახლოებით 150 მეტრით უკან დაიხია. უჩვეულო მოვლენა 9 თებერვალს, მარმარილოს ზღვაში, ქალაქ სტამბოლის სილივრის რაიონში დააფიქსირეს.
Loading ...
