ორგანიზაცია, რომელმაც გურიის ორ სკოლაში ბავშვების ცხოვრების წესი შეცვალა

რას წარმოადგენს და რას საქმიანობს ორგანიზაცია, რომელმაც გურიის ორ სკოლაში ბავშვების ცხოვრების წესი შეცვალა. ჩვენ კითხვებს პასუხობს ნიკა ზიბზიბაძე, “მაკ ჯორჯია”-ს რეგიონული პროგრამების მენეჯერი. 

• გამარჯობა – მოგესალმებით

• მკითხელისთვის რომ იყოს ცნობილი, მოკლედ გვითხარით თქვენი ორგანიზაციის შესახებ – ჩვენი ორგანიზაცია 《Mac Georgia》საქართველოში 2008 წლიდან ფუნქციონირებს, მას ასევე იცნობენ სახელით „მაკლეინის ასოციაცია ბავშვებისთვის“ და გააჩნია ორი მსხვილი მიმართულება. ერთი არის შეზღუდული შესაძლებლობების მქონე პირების მხარდაჭერა და მეორე მიმართულება  გახლავთ რეგიონული საგანმანათლებლო პროგრამა, რომელიც ეხმარება და აწვდის რესურსებს სხვადასხვა სოფლის სკოლებს, რომლებსაც ეს დახმარება სჭირდებათ.

• საქართველოს მასშტაბით რამდენი რეგიონის სკოლასთან თანამშრომლობთ? – საქართველოს მასშტაბით სულ ვმუშაობთ 10 სხვადასხვა სოფლად არსებულ სკოლასთან, რომლებიც განლაგებულია სხვადასხვა მუნიციპალიტეტებში.

• რომელია ის სკოლები რომლებთანაც თქვენ თანამშრომლობთ გურიაში? – ჩვენ გურიაში ვთანამშრომლობთ ლანჩხუთის მუნიციპალიტეტის სოფელ ჩოჩხათისა და ჩოხატაურის მუნიციპალიტეტის სოფელ შუა ამაღლების სკოლებთან.

• რა ღონისძიებებს ატარებთ ზემოთ ხსენებულ სკოლებში? – ჩვენი, რეგიონული საგანმანათლებო პროგრამის, ძირითადი მიზანი გახლავთ არაფორმალური განათლების ეფექტური იმპლემენტაცია ამ რეგიონებში არსებულ სკოლებში, რომლებშიც შეიმჩნევა ნაკლებობა მსგავსი პროექტების, გარდა ამისა გვაქვს მასწავლებელთა ხელშეწყობის პროგრამა, ადმინისტრაციის განვითარების ხელშემწყობი პროგრამა, გვაქვს ინგლისური ენის შემსწავლელი წრეები, ასევე გვაქვს სასტიპენდიო პროგრამა, რომლის ფარგლებშიც ჩვენი პარტნიორი სკოლების კურსდამთავრებულებს ვუფინანსებთ სწავლას უმაღლეს სასწავლებლებში. არაფორმალური განათლების კუთხით ვახორციელებთ სხვადასხვა მსხვილ პროგრამებს: საშაბათკვირეო აკადემიებს, საზაფხულო ბანაკებს, ლიდერთა ეროვნულ კონფერენციებს, თეატრალურ პროგრამებს. მოკლედ შემოქმედებითად ძალიან დატვირთულია და ყველა იმ ძირითად კომპონენტებს მოიცავს რომელიც განავითარებს ახალგაზრდებში კრიტიკულ აზროვნებას და გამოუმუშავებთ მათ იმ უნარებს, რომელიც მნიშვნელოვანია საქართველოს დასაქმების ბაზარზე და არამხოლოდ საქართველოს ბაზარზე.

• რამდენი ხანია თანამშრომლობთ გურიის ამ სკოლებთან და კიდევ რამდენ ხანს გაგრძელდება ეს თანამშრომლობა თქვენს შორის? – თანამშრომლობის სტანდარტული პერიოდი ჩვენთან გრძელდება 2 წელი. მიგვაჩნია, რომ ამ პერიოდში ჩვენ შეგვიძლია სკოლებსა და ახალგაზრდებს მივაწოდოთ პროექტების და აქტივობების ის რაოდენობა, რომელიც მიცემს მათ ინერციას და შემდგომ ჩვენი მცირედი ჩარევით შეძლებენ ამ ინერციის შენარჩუნებას და გააგრძელებენ მსგავსი ტიპის აქტივობებს ჩვენგან დამოუკიდებელად. გურიის სკოლებთან თანამშრომლობის ერთი წელი გავიდა და დარჩა კიდევ ერთი წელი მაგრამ პანდემიამ ხელი შეგვიშალა და ვფიქრობთ, რომ ჩვენი თანამშრომლობა გაგრძელდება მომავალ სასწავლო წელსაც.

• რა არის თქვენი მიზანი ამ სკოლებთან ურთიერთობისას? – სიმართლე რომ გითხრათ ჩემი პირადი მიზანია რაც შეიძლება მეტი ღიმილი დავინახო ბავშვების სახეზე, რეგიონში და სოფელში მცხოვრები ბავშვებისთვის ცხოვრების მრავალფეროვნება უცხო ფენომენია. ვცდილობთ მათი ცხოვრება გავხადოთ მხიარული, მრავალფეროვანი და დავეხმაროთ სოფელს აღზარდოს განათლებული ახალგაზრდები, რომლებიც შემდგომ გარკვეულ სიკეთეს მოუტანენ სოფელს და დაეხმარებიან განვითარებაში. ჩვენ ვფიქრობთ რომ ინვესტიცია განათლებაში არის ყველაზე სწორი ინვესტიცია, რომელიც შეიძლება განხორციელდეს.

• რას ფიქრობთ გურულ ბავშვებზე (ბაღნებზე :)), რომლებთანაც თქვენ გაქვთ შეხება – საინტერესო შეკითხვაა. ჩვენ მანამდე გურულ ბავშვებთან (ბაღნებთან) არ გვქონია შეხება. ისინი ყველასგან განსხვავებულები არიან, არიან საოცრად სხარტები და ჩვენს პროგრამაში საოცარი სითბო და ხალისი შემოიტანეს.

მასალა პროექტის “ჩვენ ვირჩევთ, ჩვენ ვაკონტროლებთ” ფარგლებში, ახალგაზრდა რეპორტიორმა დიმიტრი მოდებაძემ  მოამზადა.

Funded through the Alumni Grants Program, U.S. Embassy in Georgia/დაფინანსებულია საქართველოში აშშ–ის საელჩოს ალუმნი საგრანტო პროგრამის ფარგლებში.