ოპოზიციური პარტიების ნაწილი ეუთო-ს გენერალურ მდივანს ხვდება

ეუთო-ს გენერალური მდივანი, ფერიდუნ სინირლიოღლუ ოპოზიციური პარტიების ნაწილს ხვდება.

შეხვედრას ესწრებიან პარტია ერთიანობა ნაციონალური მოძრაობის, კოალიცია ძლიერი საქართველოსთვის და გახარია-საქართველოსთვის წარმომადგენლები.

“მე მიმაჩნია, რომ შემცდარი არის ის ხალხი, ვინც ამ შეხვედრაზე, რომელიც, სხვათა შორის, იმართება ეუთოს მოთხოვნით ანუ მათი ინიციატივაა ჩათვალეს, რომ არ უნდა მიიღონ მონაწილეობა იმიტომ, რომ ჩვენ ვნახეთ, მათ შორის გუშინ, ტყუილების კასკადი, რომელსაც დეფაქტო არალეგიტიმური მინისტრი ეუბნებოდა ხალხს, რომ თითქოს ოპოზიციის აზრი არავის არ აინტერესებს და საერთოდ შეხვედრა არ იგეგმება. ეს აჩვენებს, რომ არაკომპეტენტური და მატყუარა, ასე ვთქვათ, მინისტრი გვყავს. ძალიან მნიშვნელოვანია, პირიქით, ვფიქრობ, რომ ჩვენი პოზიციები სრულად გავაცნოთ ეუთო-ს წარმომადგენელს იმიტომ, რომ მან უნდა დაინახოს ის სრული სურათი, რომელიც დღეს ქვეყანაში არის შექმნილი პოლიტიკურ კრიზისთან მიმართებაში. და სწორედ ეს არის მიზანი ამ შეხვედრის, რომ მაქსიმალურად მეტი ინფორმაციის გაცვლა მოხდეს იმიტომ, რომ ჩვენი ამოცანა ხომ არ არის საქართველოს, ასე ვთქვათ, განდევნა საერთაშორისო თანამშრომლობის ფორმატებიდან, ჩვენი ამოცანა არის ამ ფორმატების გამოყენება” – განაცხადა კოალიცია ძლიერი საქართველოს წევრმა, სალომე სამადაშვილმა ფორმულასთან.

“ეუთო-ს აქვს ძალიან მნიშვნელოვანი დღის წესრიგი საქართველოსთან დაკავშირებით და საქართველოს აქვს, როგორც სახელმწიფოს, ვალდებულებები, მათ შორის  უპირველეს ყოვლისა ეს არის ბუნებრივია თავისუფალი სამართლიანი არჩევნები, ადამიანის უფლებები, დემოკრატია და ის, რაც ხდება დღეს საქართველოში, ბუნებრივია, ამ მიმართულებით აბსოლუტურად საწინააღმდეგოა ამ პრინციპებთან და ალბათ ამაზე იქნება საუბარი” – თქვა ჟურნალისტებთან საუბრისას გიგი წერეთელმა, ერთიანობა ნაციონალური მოძრაობის ერთ-ერთმა ლიდერმა.

გიორგი გახარია ეუთო-ს გენერალურ მდივანს ცალკე შეხვდა. შეხვედრაზე უარი განაცხადა კოალიციამ ცვლილებისთვის. მიზეზად ფერიდუნ სინირლიოღლუს “არალეგიტიმურ ხელისუფლებასთან შეხვედრას” ასახელებენ.