ოპოზიცია გერმანულ მოდელზე დაფუძნებულ საარჩევნო სისტემას მოითხოვს

ოპოზიციურმა პარტიებმა მოითხოვეს, რომ მმართველი პარტია „ქართული ოცნება“ დათანხმდეს მომდევნო არჩევნების ჩატარებას ე.წ-ლ გერმანულ მოდელზე დაფუძნებული სისტემით.

„ლეიბორისტული პარტიის“ ოფისში 25 ნოემბერს გამართული შეხვედრის შემდეგ, საპარლამენტო და არასაპარლამენტო ოპოზიციური პარტიების საერთო პოზიცია მედიას გააცნო „ახალი საქართველოს“ ლიდერმა, გიორგი ვაშაძემ. მისი განმარტებით, სისტემა, რომელსაც ოპოზიცია ხელისუფლებას სთავაზობს, ითვალისწინებს კანდიდატებს შორის ხმების პროპორციულად განაწილებას და მაჟორიტარული სისტემის შენარჩუნებას, თუმცა, მრავალმანდატიან ოლქებში.

ვაშაძის განცხადებით, იქნება ექვს, შვიდ, ან რვამანდატიანი ოლქები, თითოეულ ამომრჩეველს ექნება ერთი ხმის უფლება და არცერთ პოლიტიკურ ძალას არ ექნება ხელისუფლების მიტაცების შესაძელებლობა. გიორგი ვაშაძის თქმით, ეს სისტემა “ქართულ ოცნებას” არ მისცემს მანიპულაციის შესაძლებლობას: „მიიღებს 25%-ს, ეყოლება 25% დეპუტატების. მიიღებს 40%-ს ეყოლება 40% დეპუტატების და ასე შემდეგ“.

ოპოზიცია აცხადებს, რომ ეს მოდელი სრულად შეესაბამება საქართველოს კონსტიტუციას, გამოხატავს საზოგადოებრივ აზრს, უპირატესობას ანიჭებს პროპორციულ სისტემას და ამასთან, ითვალისწინებს საქართველოს რეალობას.

გიორგი ვაშაძის ინფორმაციით, ოპოზიციის მიერ შემუშავებული დოკუმენტი, რომელიც საერთაშორისო ორგანიზაციებსაც გადაეცემა, მზად არის პარლამენტში ინიცირებისთვის და დასამტკიცებლად მხოლოდ 76 ხმა სჭირდება და არა საკონსტიტუციო უმრავლესობა.

„ეს არის ძალიან მარტივი გზა, გამოსავალი იმისთვის, რომ საქართველომ ერთხელ და სამუდამოდ გადალახოს კატასტროფული საარჩევნო სისტემა, რომელიც დღეს არის ქვეყანაში“, – განაცხადა გიორგი ვაშაძემ. მისი ინფორმაციით, ყველა კონსტიტუციონალისტი, ვისთანაც საუბარი ჰქონდათ, ცალსახად ამბობს, რომ ეს მოდელი სრულ შესაბამისობაშია საქართველოს კონსტიტუციასთან.

“პარლამენტის სხდომა მშვიდობიანად ჩატარდება მხოლოდ მაშინ, როცა ჩვენი მოთხოვნა დაკმაყოფილდება. აი, ამ კანონს რომ მიიღებს პარლამენტი, პრობლემა არ ექნება პიკეტირებასთან დაკავშირებით”, – თქვა ვაშაძემ ოპოზიციის ლიდერების შეხვედრის შემდეგ გამართულ ბრიფინგზე.

www.radiotavisupleba.ge