ოკუპირებულ აფხაზეთიდან თბილისში საცხოვრებლად გადმოსული “ტიკ-ტოკერის” წინააღმდეგ საქმე აღძრეს

ოკუპირებულ აფხაზეთში თბილისში საცხოვრებლად გადმოსული “ტიკ-ტოკერის”,  რუსლან გამისონიას წინააღმდეგ საქმე აღძრეს.

მარიონეტული ხელისუფლება გამისონიას „სახელმწიფო საზღვრის უკანონო კვეთასა“ და  “აფხაზეთის ტერიტორიული მთლიანობისა და ხელშეუხებლობის დარღვევისკენ“ მოწოდებებს ედავება.

ე.წ. პროკურატურის საიტზე გავრცელებული ინფორმაციის მიხედვით, “აფხაზეთის რეპუბლიკის” მოქალაქემ, რუსლან გამისონიამ, 2022 წელს დაარღვია “აფხაზეთის კანონი და უკანონოდ გადაკვეთა ქვეყნის საზღვარი და გადავიდა საქართველოში, ხოლო 2022 წლის აგვისტოს სოციალურ ქსელში სხვა სახელით და გვარით- დაურ ბუავათი, დარეგისტრირდა”.

ოკუპირებული აფხაზეთის ე.წ. პროკურატურის განმარტებით, სხვა სახელით დარეგისტრირებული პირი სოციალურ ქსელში სისტემატურად ავრცელებდა ინფორმაციას და  საქართველოს შემადგენლობაში აფხაზეთის შესვლას ითხოვდა.

აფხაზეთის ე.წ. პროკურატურის ინფორმაციით, გამისონია წარსულში ნასამართლევია განზრახ მკვლელობის, ასევე, გაუპატიურებისა და გარყვნილი ქმედების ფაქტზე.