ოზურგეთში ქმარმა ცოლი მოკლა – რა მოხდა სოფელ ჭანიეთში (+ვიდეო)

ოზურგეთის მუნიციპალიტეტის სოფელ ჭანიეთში მკვლელობა მოხდა. მამაკაცმა ცოლს სანადირო თოფიდან საკუთარ ეზოში ესროლა. 55 წლამდე ქალი ადგილზე დაიღუპა. ჯერჯერობით უცნობია ზუსტი მოტივი, თუმცა საუბარია რამდენიმე ვერსიაზე. “გურიაTV”-ს ინფორმაციით, მამაკაცი ადგილიდან მიიმალა. ცხედარი ქუთაისში ექსპერტიზაზე გადაიყვანეს. ადგილზე ექსპერტ-კრიმინალისტები მუშაობდნენ.

შემთხვევიდან რამდენიმე საათში, გურიის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, ოჯახის წევრის მიმართ დამამძიმებელ გარემოებაში ჩადენილი განზრახ მკვლელობის ბრალდებით 1956 წელს დაბადებული ზ.რ. დააკავეს.

დანაშაული 16-დან 20 წლამდე, ან უვადოდ თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა მიმდინარე წლის 22 აგვისტოს, ოზურგეთის მუნიციპალიტეტში, საკუთარ საცხოვრებელ სახლში, ურთიერთშელაპარაკების ნიადაგზე, სანადირო თოფიდან გასროლით თავის არეში ჭრილობა მიაყენა მეუღლეს – 1969 წელს დაბადებულ ნ.გ.-ს. რის შედეგადაც ნ.გ. შემთხვევის ადგილზევე გარდაიცვალა.

სამართალდამცველებმა დანაშაულში ბრალდებული ზ.რ. ცხელ კვალზე დააკავეს.

პოლიციამ დანაშაულის ჩადენის იარაღი ნივთმტკიცებად ამოიღო.

გამოძიება სისხლის სამართლის კოდექსის 11 პრიმა 109 -ე მუხლით მიმდინარეობს.