ოზურგეთში ერთ-ერთმა მოქალაქემ თხევად იოგურტში თაგვი აღმოაჩინა. შემთხვევა გუშინ მოხდა, როცა მან ე.წ. გაკირულის უბანში მდებარე ერთ-ერთ ქსელურ მაღაზიაში ”ჩუდოს” მიერ წარმოებული თხევადი იოგურტი იყიდა.
ამასთან დაკავშირებით მოქალაქემ სოციალურ ქსელშიც დაწერა. ის სასწრაფოდ ითხოვს ”ჩუდოს” წარმოებული პროდუქციის სათანადო კვლევას.
”ჭიქაში გადმოსხმის დროს გადმოსრიალდა ბოთლიდან თაგვი. საშინელება იყო”- ამბობს მომხმარებელი.
TokTv დაკავშირდა კომპანია “ვიმ ბილ დან საქართველო”-ს, რომელიც “ჩუდოს” პროდუქციას აწარმოებს.
კომპანიიდან მიღებულ ინფორმაციაში ვკითხულობთ:
“გვინდა მოკლედ გაგაცნოთ, თუ როგორ ხდება პროდუქციის წარმოება ჩვენს ქარხანაში: ჩვენს კომპანიაში წარმოების სრულად დახურული პროცესია – რძის მიღებიდან, დაფასოების ჩათვლით. ტექნოლოგიური ციკლი ფილტრაციის რამდენიმე ეტაპს მოიცავს, შემდეგ კი გადის იქს რეი (X Ray) დეტექტორს, რომელიც ამჩნევს უმცირეს დეტალებსაც კი. მხოლოდ იქს რეის გავლის შემდეგ გადადის პროდუქცია საწყობში, რაც გამორიცხავს რაიმე ელემენტის მოხვედრას.”
რაც შეეხება სურსათის ეროვნულ სააგენტოს, უწყებაში განაცხადეს, რომ საკითხზე მოკვლევა უკვე დაწყებულია.
Loading ...