ოზურგეთში მერიამ ”გურიის მოამბის” კუთვნილი ბილბორდების დემონტაჟი მოახდინა

ოზურგეთის მუნიციპალიტეტის მერიამ მედია–გამომცემლობა ‘’გურიის მოამბის’’ კუთვნილი ბილბორდების დემონტაჟი მოახდინა.

როგორც გურიის მოამბის დამფუძნებელი ვლადიმერ მენაბდე აცხადებს, აღნიშნული ნაბიჯი  ‘’გურიის მოამბის ‘’ კრიტიკულ პოზიციას და ერთ–ერთ ბილბორდზე უკრაინის მხარდამჭერი ბანერის განთავსებას უკავშირდება.

ოზურგეთის მუნიციპალიტეტის მერიაში კამერასთან კომენტარს არ აკეთებენ, წერილობით კი აცხადებენ რომ ბილბორდების დემონტაჟი საიჯარო ქირის გადაუხდელობის გამო მოახდინეს და ხსენებული ნაბიჯი კანონმდებლობის დაცვით განახორციელეს.

აღნიშნულს კატეგორიულად უარყოფს ”გურიის მოამბის” ადვოკატი კახა ჩავლეშვილი. ადვოკატი მომხდარით გაოგნებულია, იმაში, რაც მოხდა, ვერცერთ კანონიერ ქმედებას ვერ ხედავს და აცხადებს, რომ მერიამ ყველა ღონისძიება კანონის გვერდის ავლით, მიზანმიმართული დარღვევებით განახორციელა. ბილბორდების დემონტაჟი დადგენილების გარეშე წამოიწყო, ამის შესახებ მფლობელს არაფერი აცნობა და საბოლოოდ გურიის მოამბის კუთვნილი ქონება მეპატრონისთვის დაბრუნების ნაცვლად გაურკვეველი მიმართულებით წაიღო.

მედია–ორგანიზაცია სასამართლოში დავას ცხადია გეგმავს, მაგრამ მეორე საკითხია ოზურგეთის სასამართლოს თითქმის პარალიზებული მუშაობის პირობებში, რაც მოსამართლეების სიმცირით და მეორეს მხრივ აურაცხელი განუხილველი საქმეებით არის განპირობებული, როდის მიეცემა გურიის მოამბეს საკუთარი ინტერესების და უფლებების სასამართლო პროცესზე დაცვის საშუალება.