ოზურგეთში კონტაქტური სასწავლო პროცესი 1 თებერვალს დაიწყება

ოზურგეთში არსებულ 42 საჯარო და 2 სასულიერო სკოლაში სასწავლო პროცესი კონტაქტურ რეჟიმში, ორშაბათს, 1 თებერვალს გაგრძელდება. აღნიშნულთან დაკავშირებით ინფორმაცია ოზურგეთის საგანმანათლებლო რესურსცენტრის ხელმძღვანელმა, ლელა იმედაშვილმა მოგვცა. საჯარო სკოლებში საგაკვეთილო პროცესი პანდემიიდან გამომდინარე სრული რეგულაციების დაცვით წარიმართება. თერმოსკრინინგი, დისტანციის დაცვა, ოთახების განიავება და პირბადეების ტარება ადმინისტრაციისა და პედაგოგებისათვის კვლავაც ძალაში რჩება. სკოლებისა და რესურსცენტრის სურვილია, რომ მეორე სემესტრი სასწავლო დაწესებულებებში საკლასო ოთახებში დასრულდეს და როგორც იმედაშვილი ამბობს ამისთვის ყველაფერს გააკეთებენ. სიახლეა ის, რომ მასწავლებლების ტესტირება სავალდებულო ხდება და პედაგოგები ორ კვირაში ერთხელ დაიტესტებიან. დღეის მდგომარეობით ოზურგეთში არსებული 1500 -მდე პედაგოგიდან 903 უკვე დაიტესტა. როგორც თავში ავღნიშნეთ საგაკვეთილო პროცესი სკოლებში 1 თებერვლიდან გაანახლდება. რაც შეეხება დროს – სასწავლო საათებს კლასებისათვის თავად სკოლები შეადგენენ და დააწესებენ.