ოზურგეთში ე.წ. რკინა-ბეტონის კორპუსის მოსახლეობამ გზა გადაკეტა – რას ითხოვენ ადგილობრივები

ოზურგეთში, ხვედელიძის ქუჩაზე ე.წ. რკინა-ბეტონის კორპუსის მოსახლეობამ ასფალტის დაგების სამუშაოები შეაჩერა და ტექნიკას გზა გადაუკეტა. მოსახლეობა აღნიშნული გზის დაგებასთან ერთად კორპუსის ეზოს მოწესრიგებას ითხოვს. ადგილობრივები ამბობენ, რომ უკვე მრავალი წელია კორპუსს არაერთი ინფრასტრუქტურული პრობლემა აქვს. ხელისუფლებამ კი ქუჩაზე გზის დაგება დაიწყო, მაგრამ ეზო გამოტოვა. “როცა წვიმს, ფაქტიურად ნავია საჭირო, რომ კორპუსის ეზოში გადაადგილდე. ახლა კი, როცა გზა დაიგო, ეზოში წყალი უარესად შემოვა. ისედაც წყლის, კანალიზაციის და ათასი სხვა პრობლემა გვაქვს და რა იქნებოდა, გზასთან ერთად ეს მცირე მონაკვეთიც მოეასფალტებინათ” – აცხადებენ კორპუსის მცხოვრებნი. ადგილზე იმყოფებოდა ოზურგეთის მუნიციპალიტეტის მერიც. აზრთა სხვადასხვაობის და საკმაოდ ცხარე დისკუსიის შემდეგ მოსახლეობამ დაკეტილი ქუჩა გახსნა. მუნიციპალიტეტის მერმა კი განაცხადა, რომ მოსახლეობას აღნიშნული პრობლემა ახლა ვერ, თუმცა ახლო მომავალში მოუგვარდება.