დღეს ერთიანი ეროვნული გამოცდები დაიწყო. პირველი გამოცდა ქართულ ენასა და ლიტერატურაში ტარდება. დილის 8 საათიდან საგამოცდო ცენტრებში რეგისტრაცია მიმდინარეობდა. რეგულაციების თანახმად, აბიტურიენტებმა გაიარეს თერმოსკრინინგიც.უშუალოდ საგამოცდო პროცესი 9 საათზე დაიწყო. პირველივე სესიის დაწყებისას, ოზურგეთის N2 საჯარო სკოლაში არსებულ საგამოცდო ცენტრში, ერთ აბიტურიენტს ტემპერატურა დაუფიქსირდა. ის საგამოცდო ცენტრის ხელმძღვანელის გადაწყვეტილებით და რეკომენდაციის შესაბამისად იზოლირებულად, ცალკე სექტორში დასვეს. როგორც გამოცდიდან გამოსული აბიტურიენტები ამბობენ, მასალაზე სამუშაო პირობები ნორმალური იყო. საგამოცდო ოთახებში გრილოდა. ახალგაზრდებს პირბადეების გაკეთებას მხოლოდ კონდინცირების ჩართვისას სთხოვდნენ. აბიტურიენტებმა ტესტებზეც ისაუბრეს და აღნიშნეს, რომ ტესტები საშუალო სირთულის იყო.
გურიაში მხოლოდ ერთი საგამოცდო ცენტრი, ოზურგეთის N2 საჯარო სკოლაშია განთავსებული. ერთიანი ეროვნული გამოცდები 25 ივლისამდე გაგრძელდება.
Loading ...