ოზურგეთის მუნიციპალიტეტის უფასო სასადილოს ბენეფიციარები ოზურგეთის მერიის პასუხით უკმაყოფილოები არიან და მერთან შეხვედრა სურთ. ”გურიაTV”-ს ერთ-ერთმა ბენეფიციარმა რომან ჟღენტმა მომართა:
”გავიგეთ, რომ წლის ბოლოს ტენდერი ცხადდება უფასო სასადილოსთან დაკავშირებით. ჩვენ გვსურს, რომ კვლავ ინდმეწარმე ნათია ღლონტის ობიექტში დავრჩეთ, სადაც უკვე სამი წელია იქ ვიკვებებით. კარგი პირობებია და არ გვსურს უარეს პირობებში დაბრუნება, სადაც წლების წინ ვიყავით. ამ თხოვნით მივმართეთ მერს ავთანდილ თალაკვაძეს, რომელიც დაგვპირდა,რომ საკითხს შეისწავლიდა, მასთან პირადად დაგვიბარებდა და შეგვატყობინებდა, რა იქნებოდა შესაძლებელი. თუმცა დღეს მერიისგან მივიღეთ წერილი, სადაც წერია, რომ მერიამ ტენდერი უნდა გამოაცხადოს და უფასო სასადილოს ბენეფიციარების მომსახურებას ტენდერში გამარჯვებული კომპანია გააგრძელებს. ჩვენ უკმაყოფილოები ვართ ამ პასუხით, რადგან მერი პირადად შეხვედრას და ვითარების შესწავლას დაგვპირდა და თავს მოტყუებულებად ვგრძნობთ” – განაცხადა რომან ჟღენტმა.
ოზურგეთის მუნიციპლაიტეტის მერიის მიერ ჟღენტისადმი მიწერილ წერილში ნათქვამია, რომ ინდმეწარმე ნათია ღლონტს სახელშეკრულებო ვადა ამ წლის 31 დეკემბერს უმთავრდება, შესაბამისად, მერია ტენდერს გამოაცხადებს და ბენეფიციარების მომსახურებას გამარჯვებული კომპანია გააგრძელებს. მერიის განცხადებით, ორგანო მოკლებულია შესაძლებლობას, სერვისის გამწევი ორგანიზაცია ბენეფიციარების სურვილის მიხედვით შეარჩიოს.
ოზურგეთის მუნიციპალიტეტის მერიაში აცხადებენ, რომ მერი მოქალაქეებთან შეხვედრას უახლოეს მომავალში აპირებს. რაც შეეხება უფასო სასადილოთი მომსახურებაზე ტენდერს, ის, სავარაუდოდ, მომდევნო კვირაში გამოცხადდება და ტენდერის პირობებში მაქსიმალურად იქნება გათვალისწინებული ბენეფიციარების ინტერესები. მერიაში ამბობენ, რომ მუშაობენ იმაზე, რომ მომდევნო წლიდან უფასო სასადილოთი მოსარგებლე მოქალაქეების პირობები გაუმჯობესდეს.
Loading ...