ოზურგეთის სასამართლო ფაქტიურად პარალიზებულია – რას მოითხოვენ ოზურგეთელი ადვოკატები

ოზურგეთში მოქმედი ადვოკატები საგანგებო განცხადებას ავრცელებენ და იუსტიციის უმაღლეს საბჭოს დროული ქმედებისკენ მოუწოდებენ. მათი განცხადებით, ოზურგეთში მუშაობს მხოლოდ ორი მოსამართლე, მოსამართლეების გარეშეა დაჩენილი ჩოხატაურისა და ლანჩხუთის მაგისტრატი სასამართლოები, აქედან გამომდინარე,არ არის განხილული ჯერ კიდევ 2016 წელს შეტანილი სარჩელებიც კი. ადვოკატების განცხადებით, ამით ირღვევა მოქალაქეების კონსტიტუციით გარანტირებული უფლებები და ამავდროულად თავად ადვოკატები ფაქტიურად სამუშაოს გარეშე არიან დარჩენილები. განმცხადებლები იუსტიციის უმაღლეს საბჭოს მოუწოდებენ არაუმცირეს სამი მოსამართლე, ორი წლის ვადით, მოვლენილ იქნას ოზურგეთის სასამართლოში, რათა შესაძლებელი გახდეს წლობით გაჩერებული საქმეების დროული განხილვა.

” საქართველოს იუსტიციის უმაღლესი საბჭოს მდივანს

საქართველოს ადვოკატთა ასოციაციის წევრების, ადვოკატების  განცხადება

მოგახსენებთ, რომ ოზურგეთის რაიონული სასამართლო ვერ აუდის საქმეთა ნაკადს, განსაკუთრებით პრობლემატურია სამოქალაქო და ადმინისტრაციულ საქმეთა განხილვა, ჯერ კიდევ არ არის დასრულებული 2016 წლის საქმეები, ამავდროულად ახალი საქმეების 99%-ის ჩანიშვნის იმედი აღარ გვაქვს უახლოეს ერთ წელიწადში (შეიძლება უფრო მეტი დროც დასჭირდეს). ინტენსიურად განიხილება სისხლის სამართლის საქმეები და აქაც გვაქვს დაუსრულებელ საქმეთა მნიშვნელოვანი რაოდენობა. სასამართლოში განმწესებულია მხოლოდ ორი მოსამართლე (ლანჩხუთის და ჩოხატაურის მაგისტრატი სასამართლო მოსამართლეების გარეშეა), რომლებიც ფაქტიურად 24/7 რეჟიმში მუშაობენ, მაგრამ აღნიშნული საკმარისი არ არის და სამართალწარმოების ყოველი მხარე დაზარალებულნი ვართ.

საქართველოს კონსტიტუციის 64-ე მუხლის პირველი ნაწილის შესაბამისად იუსტიციის უმაღლესი საბჭო ვალდებულია ფლობდეს რაიონული სასამართლოების შესახებ ინფორმაციას, ჰქონდეს ხელთ სტატისტიკური მონაცემები და თავად იღებდეს ზომებს შესაძლო ან/და არსებული პრობლემების გამოსასწორებლად.  რასაც ფაქტიურად ვერ ვგრძნობთ და ვერ ვხედავთ. საქართველოს მასშტაბით 9 რაიონულ სასამართლოში, მათ შორის ოზურგეთის რაიონულ სასამართლოშიც  არის 2 ან 1 ან არცერთი მოსამართლე, ხოლო თბილისის საქალაქო სასამართლოში 127 მოსამართლეა.  მიგვაჩნია, რომ აღნიშნული გადანაწილება უსამართლოა და რაიონული სასამართლოების მუშაობის პარალიზებას იწვევს, რაც ფაქტიურად სასამართლო სისტემის პარალიზებაა და სიტუაციის მშვიბობიანი გადაწყვეტისათვის თავად იუსტიციის საბჭომ უნდა უზრუნველყოს მოსამართლეთა პროპორცული გადანაწილება სასამართლოებში.

თქვენი უმოქმედობის გამო ირღვევა მოქალაქეთა კონსტიტუციით და საერთაშორისო აქტებით გარანტირებული უფლებები, მათ შორის „საქმის სამართლიანი და დროული განხილვის უფლება.“ მოქალაქეები წლებია ელოდებიან თავიანთ სარჩელებზე და განცხადებებზე რეაგირებას, სამოქალაქო (და არამარტო) სპეციალიზაციის ადვოკატები ფაქტიურად დავრჩით სამუშაოს გარეშე, მოსამართლეების ფაქტობრივი სამუშაო საათების რაოდენობა მნიშვნელოვნად აღემატება კანონით დადგენილ სამუშაო საათების ოდენობას, ირღვევა მათი უფლებებიც.

საქართველოს კონსტიტუციის 31-ე მუხლის 1-3 ნაწილებით, 64-ე მუხლით, საერთო სასამართლოების შესახებ  საქართველოს კანონის 34¹-ე მუხლით იუსტიციის უმაღლეს საბჭოს ვთხოვთ მოახდინოთ არაუმცირეს 3 მოსამართლის მივლინება 2 წლის ვადით ოზურგეთის რაიონულ სასამართლოში და ასევე 2 მოსამართლის მივლინებას ჩოხატაურისა და ლანჩხუთის მაგისტრატ სასამართლოში იმავე ვადით.

იმედს ვიტოვებთ დროულ რეაგირებაზე და ასევე საბჭოს ვთხოვთ ინტენსიურად განახორციელოს მოსამართლეთა შესარჩევი კონკურსების ორგანიზება.”

განმცახდებლები:

1. თინათინ ბასილაშვილი;
2. კახა ჩავლეიშვილი ;
3. მარინა ტუღუში;
4. მედეა ჯანელიძე;
5. მარიამ მაჩაბერიძე;
6. დავით მამალაძე;
7. გოჩა გორდელაძე;
8. ემზარ ურუშაძე;
9. მერაბ ფუტკარაია;
10. რეზო გობრონიძე;
11. გოჩა ძიმისტარიშვილი.