ოზურგეთის მე-60 საოლქო-საარჩევნო კომისიაში კენჭისყრის მეორე დღეს შემოსული საჩივრების განხილვა სიტყვიერი დაპირისპირების ფონზე წარიმართა. საოლქო კომისიამ 10 საჩივარი განიხილა, თუმცა, ოლქის თავმჯდომარის განმარტებით, საჩივრები ძირითადად კენჭისყრის დღესთან დაკავშირებულ პროცედურულ დარღვევებს ეხებოდა, შესაბამისად კომისიამ არცერთი მათგანი არ დააკმაყოფილა. სიტყვიერი დაპირისპირება მოჰყვა ‘’ერთობა ნაციონალური მოძრაობის’’ წევრის დავით მჟავანაძის საჩივრის განხილვას, რომელშიც ის ყველა უბნის შედეგების გაუქმებას ითხოვდა, რაც მისი თქმით, უბნებზე სხვადასხვა სახის დარღვევით იყო განპირობებული. აღნიშნულის დამამტკიცებლად დავით მჟავანაძეს ფოტოები და ვიდეო-მტკიცებულებები ჰქონდა წარმოდგენილი, მაგრამ კომისიაში ვიდეოს ნახვის სურვილი არ გამოუხატავთ. საოლქო კომისიამ არ დააკმაყოფილა არც საიას ორი საჩივარი, რომელთაგანაც ერთი საჩივარი ხმის ფარულობის გამო შედეგების გაუქმებას, მეორე კი პროცედურულ დარღვევებს ეხებოდა.
Loading ...