ოზურგეთის მუნიციპალიტეტის საკრებულომ მერიას 2022 წლის ბიუჯეტის პროექტი დაუბრუნა. საკრებულოს რეკომენდაციები და შენიშვნები დარგობრივი კომისიებისა და ფრაქციების დასკვნებში აისახა, რომლებიც გასათვალისწინებლად აღმასრულებელ ორგანოს გადაეგზავნა. შეგახსენებთ, რომ ოზურგეთის მუნიციპალიტეტის 2022 წლის ბიუჯეტის პროექტი მერიამ საკრებულოს 15 ნოემბერს წარუდგინა.
შენიშვნები ბიუჯეტის არსებულ პროექტთან დაკავშირებით რამდენიმე კომისიამ გამოთქვა. მათ შორის არის განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის დასკვნა. პანდემიის დროს არსებული გამოწვევების – უმუშევრობისა და ბიზნესის ხელშეწყობის მიმართულებების არასაკმარისი ასახვა, სკოლამდელი დაწესებულებების თანამშრომელთა ხელფასების ზრდაზე უარის თქმა, შშმ პირთა ინტეგრაციის საკითხზე ზრუნვის არარსებობა – ეს იმ თემების არასრული ჩამონათვალია, რომლებიც ლელა საჯაიას კომისიამ კონსტანტინე შარაშენიძის მერობის დროს შედგენილ ბიუჯეტს დაუწუნა და შენიშვნების გასათვალისწინებლად დოკუმენტის უკან დაბრუნებაზე გასცა რეკომენდაცია.
არაერთი შენიშვნა აღმოაჩნდათ აგრარულ საკითხთა, ქონების მართვის და ბუნებვრივი რესურსების საკითხების კომისიაშიც. მათი დასკვნის მიხედვით ბიუჯეტში არ არის ასახული მოსალოდნელი საპრივატიზაციო ობიექტების ნუსხა.
შენიშვნები ჰქონდათ ფრაქცია ”ქართულ ოცნებაშიც”. ფრაქციის წევრების განცხადებით, ბიუჯეტის პროექტი პროგრამული ბიუჯეტის სტანდარტებსაც ვერ აკმაყოფილებს. დოკუმენტის სტრუქტურა ბიუჯეტის შედგენის მეთოდოლოგიასაც კი არ შეესებამება.
კანონის მიხედვით, აღმასრულებელმა ორგანომ შენიშვნები 10 დეკემბრამდე უნდა გაითვალისწინოს და დოკუმენტი უკან ამ ვადამდე დააბრუნოს.
Loading ...
