დღეს გურიის საფეხბურთო გუნდებისთვის გადამწყვეტი მატჩები გაიმართება

საქართველოს საფეხბურთო ჩემპიონატის მეოთხე ლიგის 29 ტურში, ოზურგეთის “მერცხალი” დღეს, 19 ნოემბერს ბოლო საშინაო შეხვედრას გამართავს.

ოზურგეთელები “სამგურალი 2”-ს უმასპინძლებენ.

ჩემპიონატის დასრულებამდე ორი ტურით ადრე “მერცხალს”  კვლავ 33 ქულა აქვს და მე-12 ადგილზე იმყოფება. “სამგურალ 2”-ს ერთი ქულით მეტი აქვს და ერთი საფეხურით მაღლაა სატურნირო ცხრილში. გამარჯვების შემთხვევაში ოზურგეთელი ფეხბურთელები ერთი ტურით ადრე გარანტირებულად შეინარჩუნებენ ადგილს მეოთხე ლიგაში.

შეხვედრა ოზურგეთის ცენტრალურ სტადიონზე 14 საათზე დაიწყება.

აქვე უნდა აღინიშნოს, რომ ეს პირველი შეხვედრა იქნება მას შემდეგ რაც საფეხბურთო კლუბ “მერცხალს” ახალი დირექტორი ყავს. შეხვედრამდე ორი დღით ადრე ამ პოსტზე ჯონი კალანდაძე ლაშა ლექვინაძემ შეცვალა.

მნიშვნელოვანი მატჩი ელის ლანჩხუთის “გურიას”. თუ ოზურგეთელები ლიგაში ადგილის შესანარჩუნებლად იბრძვიან, ლანჩხუთელების მიზანი ზემო ლიგაში დაწინაურებაა.

“გურია”, რომელსაც 55 ქულა აქვს და ლიდერთა სამეულშია, დღეს სტუმრად “ვი ჯორჯია 2”-ს შეხვდება. ეს შეხვედრაც 14 საათზე დაიწყება.