ოზურგეთის მუნიციპალიტეტის მერიამ საახალწლოდ, სოციალურად დაუცველ და შეჭირვებულ მოქალაქეებს საახალწლო ნობათი გადასცა. ნობათი 140 მრავალშვილიან ოჯახს, უფასო სასადილოს 180 ბენეფიციარს,66 დევნილ მოქალაქეს, მცირე საოჯახო ტიპის ბავშვთა სახლის 30 ბენეფიციარს, ანასეულის ხანდაზმულთა სახლის 20 ბენეფიციარს, სოციალურად დაუცველ და მძიმე საცხოვრებელი პირობების მქონე 80 ოჯახს და 11 უსინათლო პირს გადაეცა. მერიისვე განცხადებით, 300 ლარის ტკბილეული გადაეცა შშმ პირთა სარეაბილიტაციო ცენტრს, 2020 წლის პირველი ახალშობილის ოჯახს, 31 დეკემბერს,პოლიციისა და სახანძრო-სამაშველო სამსახურის მორიგე ეკიპაჟებს, დიალეზის ცენტრის, სასწრაფოსა და მედალფას მორიგე ექიმებს.
აღნიშნული საახალწლო ნობათისთვის, მიუხედავად ბენეფიციართა დიდი ოდენობისა, მერიამ ბიუჯეტი საკმაოდ ეკონომიურად დახარჯა, რადგან საბოლოოდ, სოციალურად შეჭირვებული მოქალაქეებისთვის საახალწლოდ დახარჯული თანხა სულ 14 440 ლარი გამოვიდა.
თუმცა სრულიად განსხვავებულად იმოქმედა ოზურგეთის მუნიციპალიტეტის მერიამ საჯარო მოხელეების ფინანსური წახალისების საკითხში. ოზურგეთის მერიის თანამშრომლებისთვის 2019 წლის მხოლოდ დეკემბრის თვეში 173 535 ლარი დაიხარჯა. რაც სოციალურად შეჭირვებული ოზურგეთელების საახალწლოდ დახარჯულ თანხაზე 12 – ჯერ მეტია.
ოზურგეთის მუნიციპალიტეტის მერს კონსტანტინე შარაშენიძეს დეკემბრის თვეში ჯილდო არ აუღია. ხოლო დანარჩენმა თანამდებობის პირებმა ჯილდო სრული ხელფასის მოცულობაში მიიღეს.
ოზურგეთის მუნიციპალიტეტის მერიაში წინასაახალწლოდ ჯილდო საჯარო მოხელეების უმრავლესობამ აიღო. ოზურგეთის ვიცე-მერმა ალეკო სურგულაძემ 2600 ლარი, მოადგილეებმა ირაკლი სირაძემ და ოსიკო თოთიბაძემ 2400-2400 ლარი აიღეს.
2000 ლარი აიღო წინასაახალწლო ჯილდოდ განათლების, კულტურის, სპორტის, ახალგაზრდულ საკითხთა, ჯანდაცვისა და სოციალური მომსახურების სამსახურის უფროსმა მარინა ჯაფარიძემ. ასევე, 2000 ლარით დაჯილდოვდა ადმინისტრაციის სამსახურის უფროსი გოგი ინწკირველი. იურიდიული სამსახურის უფროსმა ლაშა თავაძემ, კოლეგა უფროსების მსგავსად საახალწლოდ 2000 ლარი მიიღო. ეკონომიკის განვითარებისა და ქონების მართვის სამსახურის უფროსმა ალეკო მამეშვილმა, საფინანსო-საბიუჯეტო სამსახურის უფროსმა გია მამაკაიშვილმა და სხვა სამსახურების უფროსებმა, თითოეულმა ასევე, 2000 ლარი მიიღეს. აღსანიშნავია, რომ ჯილდოს სახით სრული ხელფასის ოდენობა ოზურგეთის მერიის ყველა სამსახურის უფროსმა მიიღო. ჯილდოს გარეშე მხოლოდ აუდიტის სამსახურის უფროსი კობა ხაბალაშვილი დარჩა.
ჯილდოები, ასევე, აიღეს მერის წარმომადგენლებმა და მათმა თანაშემწეებმა ოზურგეთის მუნიციპალიტეტის სოფლებში.
ოზურგეთის მუნიციპალიტეტის მერის მოადგილე ირაკლი სირაძე, შეკითხვას, რატომ არის ამხელა სხვაობა საჯარო მოხელეების ჯილდოს მოცულობასა და შეჭირვებული მოსახლეობის საახალწლო ნობათის ოდენობის მხრივ, ასე პასუხობს:
” წლის განმავლობაში სოციალური და ჯანდაცვის მიმართულებით მერიამ 1 680 000 ლარი დახარჯა. მხოლოდ დეკემბრის თვეში სოციალურად შეჭირვებულებს 360 000 ლარის მატერიალური დახმარება გაეწიათ, სტიქიით დაზარალებულმა 49 ოჯახმა კი ამავე დეკემბრის თვეში სახურავი მიიღო. ვფიქრობ, ეს ყველაფერი თქვენს კითხვას პასუხობს. საერთოდ კი საჯარო მოხელეებმა ჯილდო მთელ წელს გაწეული შრომისთვის მიიღეს და ამ თანხის მხოლოდ დეკემბრის თვეში განხილვა ალბათ სწორი არ იქნება.” – აღნიშნავს ირაკლი სირაძე.
თუმცა აღსანიშნავია, რომ 173 535 ლარი ოზურგეთის მერიამ საჯარო მოხელეების დაჯილდოებისთვის მხოლოდ დეკემბრის თვეში დახარჯა, ხოლო ბიუჯეტის რა მოცულობაა ამ მხრივ მთელი წლის განმავლობაში დახარჯული, ეს ინფორმაცია მერიას ჯერ არ მოუწოდებია. შესაბამისად, სახეზე მერის მოადგილის კომენტარი და ის ინფორმაციაა, რომელიც მუნიციპალიტეტის მერიამ საჯარო ინფორმაციის სახით მოგვაწოდა: 2019 წლის დეკემბერში საჯარო მოსამსახურეების დაჯილდოებისთვის 173 535 ლარი, ხოლო სოციალურად შეჭირვებული ოჯახების საახალწლო ნობათისთვის ამ თანხის დაახლოებით 8,5%, მხოლოდ 14 440 ლარი დაიხარჯა.
თამთა დოლიძე
Loading ...
