ოზურგეთელ ქალბატონს კორონავირუსის საწინააღმდეგო ვაქცინის გაკეთების შემდეგ ვირუსი გამოუვლინდა

ოზურგეთელ, სოფელ მელექედურში მცხოვრებ 65 წლის ქალბატონს კორონავირუსის საწინააღმდეგო ვაქცინის გაკეთების შემდეგ ვირუსი გამოუვლინდა. მელექედურელმა ქალბატონმა ვაქცინაცია ოზურგეთის ,, მედალფას’’ კლინიკაში 14 აპრილს ჩაიტარა, კორონავირუსი კი დღეს 22 აპრილს, დილით სწრაფი ტესტით ოზურგეთის საზოგადოებრივი ჯანდაცვის ცენტრში გამოუვლინდა. 65 წლის ქალბატონმა, როგორც ოზურგეთის ,, მედალფას’’ კლინიკის დირექტორის მოადგილემ, თინათინ მეგრელაძემ გვითხრა, იმუნიზაციის ჩატარების შემდეგ თავი შეუძლოდ იგრძნო. ემოციის ფონზე მას მაღალი არტერიული წნევა დაუფიქსირდა. როგორც მეგრელაძე გვეუბნება სახეზე იყო ჰიპერტენული კრიზი, რომელიც მედიკოსებმა სწორად და დროულად მართეს და იმუნიზაციაზე მისული ქალბატონი დაზღვევის მიზნიოთ მთელი ღამით დატოვეს ,,მედალფას’’ კლინიკაში. ქალბატონს უმოწმდებოდა ჰემოდინამიკური მაჩვენებლები, რომელიც ნორმაში იყო. იგი ბინაზე, სახლში დილით გაეწერა. მელექედურელი 65 წლის ქალბატონი უკვე დღეს, კორონავირუსისათვის დამახასიათებელი სიმპტომებით საზოგადოებრივი ჯანდაცვის ცენტრში მივიდა. მას სწრაფი ტესტით ,, კოვიდ 19’’ დაუდგინდა – რასაც აღნიშნული სამსახურის ეპიდემიოლოგი, ელზა სიმონიშვილი გვიდასტურებს. სახლში დაბრუნების შემდეგ, მაღალი ემოციური ფონისა და თანმხლები დაავადების ქონის გამო ქალბატონმა თავი შეუძლოდ იგრძნო და ოზურგეთის სასწრაფო დახმარების ბრიგადამ, მისივე თხოვნით ის ბათუმის ერთერთ კოვიდკლინიკაში გადაიყვანა.