ოზურგეთელი ძმები ირაკლი და ლუკა კაცაძეები, წლებია, საქართველოში, აზიური სამზარეულოს მიმართულებით წამყვან პოზიციებს იკავებენ. ირაკლი სკოლის დამთავრების შემდეგ კულინარიის სფეროთი დაინტერესდა. რვა წლის მანძილზე ის “Head Chef ”-ის პოზიციას იკავებდა, საქართველოში ყველაზე დიდ სასტუმრო და სარესტორნო კომპანიაში. როგორც ირაკლი კაცაძე ”გურია TV”-თან ამბობს, უმუშავია ძალიან ბევრ ქართველ და უცხოელ ცნობილ შეფთან. (ირაკლი ასათიანი , იუსკე იამაშიტა, გიორგი ხვისტანი და სხვები). ასევე, ირაკლი არის საქართველოს სუშის ფედერაციის თანადამაარსებელი, დღემდე უამრავ სხვადასხვა პროექტშია ჩართული და წარმატებით მიიწევს წინ თავის ძმასთან ერთად.
მისი უმცროსი ძმა ლუკა კაცაძე, ასევე, 15 წლიდან სამზარეულოს სფეროშია, აქვს ექვსწლიანი გამოცდილება სუშის მიმართულებით, ეს წლები მხოლოდ და მხოლოდ სუშის სეგმენტს მიუძღვნა და უმაღლეს დონეზე ფლობს მას.
ბიჭები გარდა საკუთარი პროფესიული განვითარებისა, ამ სფეროში გზის გაკვალვაში ცდილობენ სხვებსაც დაეხმარონ.
-” არაერთ ოზურგეთელს დავეხმარეთ აზიური სამზარეულოსა თუ სხვა კუთხით განვითარებაში და ამავე სფეროში დასაქმებაში. ისინი დღეისთვის საკმაოდ მაღალ პოზიციებს იკავებენ, რითიც ჩვენ ძალიან ვამაყობთ” – ამბობენ ძმები.
საკმაოდ დიდი გამოცდილების დაგროვების შემდეგ კი ძმებმა გადაწყვიტეს, თავიანთ კუთხეში დროებით დაბრუნებულიყვნენ და გურულებისთვის და გურიის სტუმრებისთვის, აზიური სამზარეულოს მრავალფეროვანი და ცნობილი კერძები შეეთავაზებინათ. ძმებმა მიზანი სისრულეში მოიყვანეს და დღეს ურეკში ფუნქციონირებს სუში–ბარი, რაც პირველი შემთხვევაა, როცა აზიური სამზარეულოს დაგემოვნების საშუალება ოზურგეთშია შესაძლებელი. სუში ბარი “NOMAE” , რომელიც ურეკში გაიხსნა და სტუმრების მისაღებად უკვე მზად არის, ორი მიმართლებით იმუშავებს. ესაა სუშის და ვოკის სეგმენტი.
ირაკლი და ლუკა კაცაძეების განცხადებით, ორივე მაქსიმალურად ავთენტური გემოებია, თუმცა ფასი ბიუჯეტურია , რადგან ის მხოლოდ ტურისტებზე არ არიის გათვლილი და ადგილობრივი მომხმარებლების ინტერესები და შესაძლებლობებიც გათვალისწინებულია. ბარის სახელი “NOMAE” – იაპონური სიტყვაა და ქართულად ისტორიას , სიძველეს, წარსულს ნიშნავს.
-”ამ სახელის დარქმევის მთავარი მიზანიც ძველი კერძების მომზადება, დროში გამოცდილი, კლასიკური მეთოდების გამოყენება და ავთენტური გემოს მიღებაა. ” – ამბობს ირაკლი.
ჯერჯერობით ბარს მხოლოდ ლუკა და ირაკლი უძღვებიან. კერძებს თავად ამზადებენ და მომხმარებელთანაც თავადვე მიაქვთ. ბიჭები საქმიანობა ურეკში სეზონურია, მაგრამ მათი თქმით, თუ აზიური სამზარეულო ოზურგეთლების ინტერესს გამოიწვევს, გეგმავენ, რომ სუში–ბარი ქალაქ ოზურგეთშიც გაიხსნას. : -”თუ შესაბამისი მოთხოვნა იქნება ჩვენი საქმიანობის მიმართ, ჩვენ სიამოვნებით დავრჩებით მშობლიურ ქალაქში და გავაგრძელებთ ჩვენი გამოცდილების გაზიარებასა და სასიამოვნო, ეგზოტიკური კერძების შეთავაზებას მომხმარებლებისთვის” – ამბობენ ბიჭები ”გურიაTV”-თან.
Loading ...
