ნორვეგია 15 წლამდე ბავშვებისთვის, სოციალური ქსელების გამოყენებას აკრძალავს

ნორვეგიის პრემიერ-მინისტრმა იონას გარ სტორემ განაცხადა, რომ მთავრობა 15 წლამდე ბავშვებს სოციალური ქსელებით სარგებლობას აუკრძალავს.

საუბარია იმ მოქმედ კანონში ცვლილებების შეტანაზე, რომელიც სოცქსელებზე წვდომას 13 წლამდე ბავშვებისთვის ზღუდავს. ამასთან, იგეგმება ცვლილების მიღება, რომელიც პერსონალური მონაცემების შეგროვებასა და დამუშავებისას სოციალურ ქსელებს მომხმარებლის ასაკის შემოწმებას დაავალდებულებს.

ნორვეგიის პრემიერმა განაცხადა, რომ ეს არ იქნება „იოლი ბრძოლა, მაგრამ ბავშვები სოციალურ ქსელებში განთავსებული მავნე კონტენტისგან დაცულები უნდა იყვნენ“. სტორემ დასძინა, რომ მსხვილი ტექნოლოგიური კომპანიები „პატარა ბავშვების ტვინების წინააღმდეგ“ არიან განწყობილები.

აღსანიშნავია, რომ ამ თემაზე პრემიერმა მშობლების ჯგუფთან შეხვედრისას ისაუბრა, რომლებიც სოციალური ქსელებით სარგებლობის აკრძალვას 16 წლამდე ბავშვებისთვის ითხოვენ. ამისთვის მათ სპეციალური პეტიციაც კი შექმნეს, რომელსაც 11 ათასზე მეტმა ადამიანმა მოაწერა ხელი.

მანამდე არასრულწლოვანების ნაწილისთვის სოციალური ქსელებით სარგებლობის აკრძალვის გეგმის შესახებ ავსტრალიის მთავრობაშიც განაცხადეს.