ნოდარ დუმბაძის სკვერის საგა – რა მოხდა ჩოხატაურში

დაბა ჩოხატაურში ფიზიკური დაპირისპირების საქმეზე დაკავებულ 4 პირს მოსამართლემ გირაო შეუფარდა. მიუხედავად იმისა, რომ პროკურორმა ოთხივე დაკავებულის მიმართ აღკვეთის ღონისძიების სახით პატიმრობა მოითხოვა, რათა მისი განცხადებით არსებობს ბრალდებულების მიმალვის ან მოწმეებზე გავლენის მოხდენის რისკი, მოსამართლე თორნიკე კაპანაძემ არ გაიზიარა ბრალდების მხარის პოზიცია და ოთხივე დაკავებულს  გირაო 7000 ლარის ღირებულების ქონებით უზრუნველყოფის სახით შეუფარდა. პროკურორ ლევან კლდიაშვილის განცხადებით, გადაწყვეტილება ქუთაისის სააპელაციო სასამართლოში გასაჩივრდება.

ფიზიკური დაპირისპირება ჩოხატაურში 3 სექტემბერს მოხდა, მაშინ როცა ნაციონალური მოძრაობის წევრები ბაზარში იმ ფლაერების დარიგებას აპირებდნენ, რომელიც ნოდარ დუმბაძის სკვერის გასხვისებას ეხებოდა. აღნიშნულ ტერიტორიაზე ოპოზიციის წევრებს 15–მდე პირი დახვდა და მათგან 4 ნაცმოძრაობის წევრებს ფიზიკურად გაუსწორდა. დაპირისპირების შედეგად დაშავებული დავით მჟავანაძე და არჩილ სიხარულიძე კლინიკაში გადაიყვანეს.

უკვე დღის მეორე ნახევარში პოლიციაში გამოკითხვაზე მისული დაზარალებულების მხარდასაჭერად მიმდებარე ტერიტორიაზე ოპოზიციის წევრები და მხარდამჭერები შეიკრიბნენ. ადგილზე იმყოფებოდა პარტიის ლიდერი ლევან ხაბეიშვილი, ნიკა მელია და დავით კირკიტაძე.

უკვე მეორე დღეს, ჩოხატაურში ოპოზიციის წევრები ფლაერების დასარიგებლად შეიკრიბნენ და დაბაში მოქალაქეებს ნოდარ დუმბაძის სკვერის ნაწილის გასხვისების გაპროტესტებისკენ მოუწოდეს.

‘’ქართული ოცნების’’ ადგილობრივ ლიდერებს და ხელისუფლების წარმომადგენლებს თემაზე საკმაოდ მწვავე რეაქცია ჰქონდათ, მათი თქმით, ნაცმოძრაობა თემის პროვოცირებას ეწევა, ყველაფერი მათი ბრალია და ფიზიკური დაპირისპირებაც მათ მიერ იყო ინსპირირებული.

თუმცა უკვე სასამართლო პროცესის გამართვამდე ცნობილი გახდა ცენტრალური ხელისუფლების პოზიციაც, მამუკა მდინარაძის განცხადებით, სკვერის ნაწილის გასხვისება კანონმდებლობით აკრძალულია და შესაბამისად, ნოდარ დუმბაძის სკვერის ნაწილიც ვეღარ გაიყიდება. საქართველოს ბანკს კი ფილიალის აშენება სავარაუდოდ სხვა ტერიტორიაზე მოუწევს.

საკითხი ამით ამოიწურა. უკვე ამის შემდეგ ადგილობრივი ხელისუფლების რიხით სავსე განცხადებები სკვერის ნაწილის გასხვისების აუცილებლობასთან დაკავშირებით, აღარავის მოუსმენია. სკვერი სრულად მისივე საზღვრებში კვლავ ჩოხატაურელებს დარჩათ.