ნინო პატარავა – ახალგაზრდა დიზაინერი ოზურგეთიდან

დღევანდელ სტატიაში გაგაცნობთ მხატვარს და ტანსაცმლის დიზაინერს ოზურგეთიდან, რომელიც ახლო მომავალში მოდის საკუთარი ხაზის გამოშვებას აპირებს. ნინო პატარავამ თავის გეგმებსა და მიზნებზე გურია TV-ისთან ისაუბრა.

– მოგესალმებით,მე ვარ ნინო პატარავა 31 წლის ოზურგეთიდან,პროფესიით დიზაინერი.

პატარა რომ ვიყავი,ხშირად ვადევნებდი თვალს მოდის სფეროს ტელევიზიის საშუალებით. საათობით შემეძლო მათი ცქერა,რაღაცნაირად ვგრძნობდი რომ მოდის სამყარო ჩემთან ახლოს იყო. ამიტომ ადრეული ასაკიდანვე დავიწყე ესკიზების შექმნა. რა თქმა უნდა, თავიდან იდეალურად არ გამომდიოდა ეს ყველაფერი. სამხატვრო სკოლაში სწავლაც დამეხმარა ხელის გაწვრთნაში. ნელ–ნელა ხატვაც დავიწყე და დღეისთვის გამოფენებშიც ვიღებ მონაწილეობას. ასევე,ჩემს ცოდნაში დიდი წვლილი შეიტანა კოლეჯ “ჰორიზონტში” მიღებულმა პროფესიულმა განათლებამ.

ზოგჯერ,ინსპირაციის წყარო ისეთი ადგილი შეიძლება გახდეს, საერთოდ რომ ვერ წარმომიდგენია. შთაგონების მიზეზი შეიძლება იყოს რომელიმე ნივთი თუნდაც სხვადასხვა მომღერალი ან მსახიობი. გააჩნია დილით როგორ განწყობაზე გავიღვიძებ, ამას ძალიან დიდი მნიშვნელობა აქვს ხელოვანის ცხოვრებაში. ვცდილობ, რაც შეიძლება ბევრი სასარგებლო ინფორმაცია მივიღო სხვადასხვა წყაროდან.

საყვარელი დიზაინერი ძალიან ბევრი მყავს. მათ შორის მაინც ალბათ ჟან პოლ გოტიეს გამოვყოფდი თავისი ექსტრავაგანტული ხაზით.

ამჟამად ვარ მზადების პროცესში. ვაპირებ უახლოეს მომავალში ვაწარმოო ჩემი ბრენდის ტანისამოსი. მინდა ახალი სიტყვა ვთქვა მოდის სფეროში და ხალხს შევთავაზო გამორჩეული და უცხო ტანისამოსი.

რაც შეეხება ბრენდს, აღებული მაქვს ჩემი ინიციალის და დაბადების თარიღის კომბინაციისგან შემდგარი ლოგოტიპი.

ტელეკომაპანია ”გურია TV” წარმატებებს უსურვებს ახალგაზრდა დიზაინერს.