ნიდერლანდებში დააკავეს ქართველი კაცი, რომელმაც ქალს შპრიცით ნარკოტიკული ნივთიერებები ჩუმად გაუკეთა

ნიდერლანდების სასამართლომ 31 წლის ქართველ კაცს 5-თვიანი პატიმრობა მიუსაჯა იმის გამო, რომ მან ახალგაზრდა ქალს, ჰააგის ფესტივალზე შპრიცით გაუკეთა ნივთიერება, რომელსაც თავბრუ დაეხვა, რის შემდეგაც ცუდად გახდა და საავადმყოფოში გადაიყვანეს. ინფორმაციას ადგილობრივი მედია ავრცელებს.

გამოცემა NL Times წერს, რომ ინციდენტი ზუიდერპარკში, ფესტივალზე 18 ივნისს მოხდა. ახალგაზრდა კაცი სცენაზე დააკავეს. პოლიციამ მისი ჩხრეკისას აღმოაჩინა შპრიცები, რომლებიც ნარკოტიკულ ნივთიერებებს შეიცავდა.

გამოცემის ცნობით, ფესტივალზე მყოფმა რამდენიმე ადამიანმა დაინახა, რომ 31 წლის კაცმა ქალს ნემსი ჩაარჭო.

“მაბრალებენ იმას, რაც არ გამიკეთებია” – თქვა დაკავებულმა ქართველმა და განმარტა, რომ შპრიცი თან კბილის ტკივილის გამო ჰქონდა.