„ერთიანი ნაციონალური მოძრაობა“ ხვალ, 2 დეკემბერს, საქალაქო სასამართლოსთან, ყოფილი პრეზიდენტის პროცესის პარალელურად, მიხეილ სააკაშვილის მხარდამჭერ მორიგ აქციას გამართავს. აქცია 11:00 საათზე დაიწყება.
როგორც „ინტერპრესნიუსს“ „ნაციონალური მოძრაობის“ წევრმა ბაჩო დოლიძემ განუცხადა, აქცია იქნება მშვიდობიანი ხასიათის. დოლიძე მოუწოდებს შესაბამის ორგანოებს, დაიცვან წესრიგი და არ მიმართონ პროვოკაციულ ქმედებებს დემონსტრანტებისა და მედიის წინააღმდეგ.
„ხვალ, 11:00 საათზე საქალაქო სასამართლოსთან ველოდებით ჩვენს მხარდამჭერებს, რომლებიც კიდევ ერთხელ მშვიდობიან ფორმებში გამოხატავენ მხარდაჭერას საქართველოს მესამე პრეზიდენტის მიმართ და რაღა თქმა უნდა, ეს იქნება პროტესტი პოლიტიკური მართლმსაჯულების წინააღმდეგ. რაც მთავარია, მინდა, მოვუწოდო შინაგან საქმეთა სამინისტროს და სუს-ს, რომ უზრუნველყოს მაქსიმალურად წესრიგი იმ თვალსაზრისით, რომ არ გამოიყვანონ პროვოკატორები და პოლიტიკურად ანგაჟირებული პოლიციელები, რომლებიც აბსოლუტურად ყველაფერს აკეთებენ, რომ პროვოკაციაზე გამოიყოლონ როგორც მედიის წარმომადგენლები, ასევე მშვიდობიანი დემონსტრანტები. ძალიან მნიშვნელოვანია, რომ ჩვენ, ყველამ შევინარჩუნოთ სიმშვიდე. ჩვენ მაქსიმალურად ვეცდებით, რომ მსგავსი ტიპის პროვოკატორები გამოვავლინოთ და შინაგან საქმეთა სამინისტროს წარმომადგენლებს იქვე ვაცნობოთ, მაგრამ თავისი მხრიდან შინაგან საქმეთა სამინისტროს წარმომადგენლებმა მაქსიმალურად თავი უნდა შეიკავონ პოლიტიკური განცხადებებისგან, რაც არაერთხელ კეთდებოდა წინა სასამართლო პროცესის მიმდინარეობის დროს“, – აცხადებს ბაჩო დოლიძე.
ცნობისთვის, ხვალ მიხეილ სააკაშვილის სასამართლო პროცესი ე.წ. პიჯაკების საქმეზე გაიმართება. ჯერჯერობით უცნობია, მიეცემა თუ არა ყოფილ პრეზიდენტს პროცესზე დასწრების შესაძლებლობა. რაც შეეხება წინა პროცესს, ის 29 ნოემბერს გაიმართა და 7 ნოემბრის საქმეს ეხებოდა. ამ დღეს სააკაშვილს პროცესზე დასწრების შესაძლებლობა პირველად მიეცა. ქვეყნის ყოფილმა პრეზიდენტმა სასამართლო სხდომაზე პოლიტიკური განცხადების უფლებით ისარგებლა და საზოგადოებას მიმართა. სააკაშვილის მოხსენება საათნახევრის განმავლობაში გრძელდებოდა.
Loading ...