ნაღობილევის მოსახლეობა ყაჩაღობაში ბრალდებული თანასოფლელის გათავისუფლებას ითხოვს

დღეს აქცია გაიმართა ოზურგეთის მუციპალიტეტის სოფელ ნაღობილევში. ოჯახის წევრები და თანასოფლელები, რომლებმაც საავტომობილო გზა გადაკეტეს, პატიმრის გათავისუფლებას მოითხოვენ. მათი თქმით 10 თვის წინ ყაჩაღობის ბრალდებით დაკავებულ შალვა ოქრუაძეს, რომელსაც ბრალი სულ ახლახან წარედგინა და 8 წელი მიუსაჯეს, დანაშაული არ ჩაუდენია და მას სასჯელს, ყაჩაღობის მუხლით, უკანონოდ ახდევინებენ. ოჯახის წევრები და თანასოფლელები აცხადებენ რომ შალვა ოქრუაძეს მძიმე ფიზიკური პრობლემები აქვს და ის პატიმრობას ვერ გაუძლებს ამავდროულად აცხადებენ იმას, რომ ახალგაზრდა მამაკაცი ყაჩაღობის დღეს სახლში იყო და დანაშაული არ ჩაუდენია. იქვე იყო მობილიზებული სამართალდამცავები, მათ აქციის მონაწილეებს გზის გადაკეტვის საშუალება არ მისცეს. ყაჩაღობის ფაქტი ოზურგეთის მუნიციპალიტეტის სოფელ ნაღობილევში, 10 თვის წინ ,მარტის თვეში მოხდა. ყაჩაღებმა 82 წლის მამაკაცი და 80 წლის ქალი აწამეს და სახლიდან 2500 ლარი წაიღეს. ორივე დაზარალებული ოზურგეთის კლინიკა “მედალფაში” იყო მოთავსებული. კლინიკის ინფორმაციით, მამაკაცს 10 ნეკნი ჰქონდა გატეხილი და ის რეანიმაციულ განყოფილებაში იმყოფებოდა. რაც შეეხება ქალს, მას ჭრილობა სახის არეში ჰქონდა მიყენებული. მომხდარზე გამოძიება სისხლის სამართლის კოდექსის 179-ე მუხლით აღიძრა.