ორშაბათს, 26 სექტემბერს, ნავთობის ფასები 9-თვიან მინიმუმამდე შემცირდა. მკვეთრი კლება გამოიწვია საწვავზე მოთხოვნის მოსალოდნელმა შემცირებამ და გლობალური რეცესიის რისკმა ეროვნული ბანკების მიერ საპროცენტო განაკვეთების ზრდასთან ერთად.
ამჟამად საერთაშორისო ბირჟაზე Brent-ის ტიპის ნედლი ნავთობი 85.4 დოლარიან ნიშნულზეა, WTI-ის ნედლი ნავთობი კი 78 აშშ დოლარი ღირს, რაც იანვრის შემდეგ ყველაზე დაბალი მაჩვენებლებია.
ფასზე გავლენას ახდენს დოლარის საგრძნობი გამყარებაც. დოლარის ინდექსი, რომელიც კურსს სხვა მთავარი ვალუტების მიმართ ზომავს, 20-წლიან მაქსიმუმზეა, ეს კი დოლარში დენომინირებულ ნავთობზე მოთხოვნას ამცირებს.
ამასთან ერთად, ეროვნული ბანკების მიერ მონეტარული პოლიტიკის გამკაცრება ეკონომიკის შენელების საფრთხეს აჩენს, რაც ნავთობის ნაკლებ მოხმარებასაც ნიშნავს.
ფასების დონის ზრდაზე გარკვეული ეფექტი იქონია რუსეთის მიერ უკრაინაში შეჭრის შემდეგ დასავლურმა სანქციებმა, რომლებიც რუსული ნავთობის იმპორტის აკრძალვას ითვალისწინებს დეკემბრიდან.
ახლა ყურადღების ცენტრში ნავთობის ექსპორტიორ ქვეყანათა ორგანიზაცია და მისი მოკავშირეები არიან რუსეთის თაოსნობით (OPEC+), რომელთა შეხვედრაც 5 ოქტომბერსაა ჩანიშნული. წინა შეხვედრაზე OPEC-მა წარმოების მცირედით შემცირების გადაწყვეტილება მიიღო იმ მიზნით, რომ ფასების შემცირებისგან დაეზღვია თავი.
www.bpn.ge
Loading ...