ნაბეღლავის და მთისპირის სასკოლო გუნდების გამარჯვება და შვედეთის ელჩი გურიაში

შვედეთის ელჩი ულრიკ თიდესტრომი ჩოხატაურსა და ოზურგეთში გამართულ გარემოსდაცვით საგანმანათლებლო ღონისძიებას – „ბიობლიცს“ დაესწრო.

ღონისძიებას ადგილობრივმა არასამთავრობო ორგანიზაციებმა, ბუნების დაცვის მსოფლიო ფონდთან (WWF) ერთად, შვედეთის საელჩოს ინიციატივითა და ფინანსური დახმარებით უმასპინძლეს.

„ბიობლიცში“, რომლის მთავარი თემა გურიის ბიომრავალფეროვნება იყო, მონაწილეობა ადგილობრივი სკოლების მოსწავლეებმა მიიღეს. ჩოხატაურში პირველი ადგილი ნაბეღლავის საჯარო სკოლამ მოიპოვა, მეორე–მესამე ადგილებზე კი, ქვაბღის და ჩხაკაურას სასკოლო გუნდები გავიდნენ. ოზურგეთში ჩატარებულ კონკურსში კი პირველი ადგილის მფლობელი მთისპირის სასკოლო გუნდი გახდა. ლიხაურის და ცხემლისხიდის საჯარო სკოლებმა კი მეორე–მესამე ადგილები გაინაწილეს. გამარჯვბულ გუნდებს შვედეთის ელჩმა, ულრიკ თიდესტრომმა და ბუნების დაცვის მსოფლიო ფონდის (WWF) დირექტორმა გიორგი სანადირაძემ ჯილდოები გადასცეს. ჯილდოები, ასევე, მიიღეს პედაგოგებმა.

”ძალიან ბედნიერი ვარ, რომ ულამაზეს გურიაში ვიმყოფები. შვედეთი მხარს უჭერს გურიაში ახალი ნაციონალური პარკის შექმნას. ეს, ცხადია, ნიშნავს უნიკალური ბუნების და ბიომრავალფეროვნების დაცვას ამ შესანიშნავ რეგიონში. ჩვენ, ასევე, ვიმედოვნებთ, რომ ეს ხელს შეუწყობს ახალი ეკონომიკური შესაძლებლობების გაჩენას ამ რეგიონში მცხოვრები ხალხისთვის. ეს ყველაფერი, ასევე, გულისხმობს განათლების კომპონენტსაც და დღეს შევხვდი ფანტასტიურ მოსწავლეებს ოზურგეთის სხვადასხვა სოფლიდან. ისინი ჩაერთნენ კონკურსში ”ბიობლიცი”და წარმოადგინეს თავიანთი იდეები პარკის შესახებ, თუ როგორ წარმოუდგენიათ მათ ოზურგეთელი მოსახლეობისთვის ამით მოტანილი სარგებელი. ძალიან მომწონს ამ პროექტის მიმდინარეობა. დღეს, ასევე, მქონდა შესაძლებლობა გურიის ხელისუფლებას შევხვედროდი. ჩვენ ერთად განვიხილეთ თანამშრომლობის სამომავლო შესაძლებლობები ჩემს ქვეყანასა და გურიის რეგიონს შორის” – განაცხადა ”გურიაTV”-თან ულრიკ თიდესტრომმა.

კომენტარები