სამხრეთაღმოსავლეთ თურქეთში და სირიაში ორშაბათს, გამთენიისას ძლიერი, 7,8 მაგნიტუდის მიწისძვრა მოხდა, რის შემდეგადაც დაინგრა შენობები, მოსახლეობა პანიკაში ქუჩებში გავიდა.
დამანგრეველი მიწისძვრის შედეგად სულ მცირე 76 ადამიანი დაიღუპა და 440 დაშავდა. ამის შესახებ თურქული მედია იუწყება. მანამდე დადასტურებული იყო 20-ზე მეტი ადამიანის სიკვდილი.
სააგენტო „ანადოლუ“ საგანგებო სიტუაციების სამსახურზე დაყრდნობით წერს, რომ 7,4 მაგნიტუდის მიწისძვრის ეპიცენტრი კახრამანმარაშის პროვინციაში, 7 კილომეტრის სიღრმეზე მდებარეობდა. ამერიკის შეერთებული შტატების გეოლოგიური სამსახურის მონაცემებით, 7,8 მაგნიტუდის მიწისძვრის ეპიცენტრი ქალაქ გაზიანთეპის მახლობლად იყო.
„ანადოლუს“ ცნობით, პირველ ბიძგს მოჰყვა კიდევ 42, რომელთაგან ყველაზე ძლიერის მაგნიტუდა 6,6 იყო. თურქეთში მიწისძვრის ეპიცენტრში დანგრეული, ან დაზიანებულია ასეულობით შენობა. მიმდინარეობს სამძებრო-სამაშველო ოპერაცია. თურქეთის ხელისუფლებამ განგაშის უმაღლესი დონე გამოაცხადა და დასახმარებლად საერთაშორისო თანამეგობრობას მიმართა. შინაგან საქმეთა მინისტრ სულეიმან სოილუს ინფორმაციით, დაზარალდა 10 ქალაქი, მათ შორის გაზიანთეპი, მალათია, ადანა და დიარბაქირი.
ძლიერი ბიძგები იგრძნობოდა კვიპროსზე, სირიაში, ეგვიპტეში, ლიბანსა და ერაყში. სირიის სახელმწიფო მედიის ცნობით, მიწისძვრის შედეგად დაღუპულია 42 ადამიანი.
მიწისძვრა იგრძნობოდა საქართველოშიც, ბათუმსა და სხვა ახლომდებარე ქალაქებში.
Loading ...