მსოფლიო ქალაქები ჩინურად – ლაშა ჩხაიძის რუბრიკა

ცხოვრობთ ჩინეთში და მოგინდათ ევროპული ქალაქების ნახვა? თქვენ არ დაგჭირდებათ ვიზაზე განაცხადის გაკეთება, თვითმფრინავის ბილეთების ყიდვა, ათასობით კილომეტრზე ფრენა, არ გექნებათ ენის ბარიერი, რადგან პარიზს, ლონდონს, ჰალშტატს, მოსკოვს, ნიუ იორკს, სიდნეის ოპერას, ეგვიპტურ პირამიდებს, ფლორენციას, ვენეციას და კიდევ სხვა ღირსშესანიშნაობებს ჩინეთშივე ეწვევით, ყოველგვარი საზღვრების კვეთის გარეშე. ან კიდევ, გნებავთ ჩინეთის დიდი კედელი ნახოთ? ამას ჩინეთში, დიდი კედლის ნახვის გარეშეც მოახერხებთ, თუკი სხვა პროვინციაში მის კოპირებულ ვარიანტს ეწვევით. ნამდვილად საინტერესოდ ჟღერს.

მარცხენა ფოტოზე ყალბი დიდი კედელი, მარჯვნივ ჩინეთის დიდი კედელი

კოპირებული ღირსშესანიშნაობები ახალი ხილი ნამდვილად არ არის მსოფლიოსთვის, თუნდაც თავისუფლების ქანდაკებას ტოკიოში და პარიზშიც გადავაწყდებით, თუმცა ჩინელების მიერ ქალაქების სრული ასლების დამზადება, როგორც ანგლო-საქსები იტყვიან – მაინც სხვა ლეველია.

შანხაიდან რამდენიმე საათის გზაზე პარიზია აგებული თავისი ეიფელის კოშკით. დეველოპერულმა კომპანიებმა ქალაქში 10 000 ადამიანის საცხოვრებლად განკუთვნილი კორპუსებიც ააშენეს, თუმცა ხალხმა იქ ცხოვრება არ მოისურვა და პარიზი ძირითადად ცარიელია.

Fake პარიზი

ჩინეთში მსოფლიო ქალაქების ასლების გამოჩენა გამოიწვია ქვეყანაში 1990 წელს დაწყებულმა  ეკონომიკურმა ბუმმა. როგორც ერთი ექსპერტი განმარტავს, მოქალაქეებს სურდათ ისეთი სახლები, რომლითაც შეძლებდნენ გამოესახათ გლობალური მასშტაბის სიმდიდრე და წარმატება და ამის მისაღწევად დასავლური არქიტექტურის შედევრები გამოიყენეს. 2000-იანი წლების დასაწყისიდან მსგავსი რეპლიკები ქვეყანაში სოკოებივით მომრავლდა. მაგალითად, იუნესკოს მსოფლიო მემკვიდრეობის ძეგლის, ავსტრიის ალპებში მდებარე სოფელი ჰალშტატის ასლის დამზადება ჩინეთში თითქმის მილიარდი დოლარი დაჯდა.

მარცხნივ ჰალშტატი ავსტრიულად, მარჯვნივ ჰალშტატი ჩინურად

2012 წელს ჩინეთში აშენდა ლონდონის თაუერ ბრიჯის ასლი, რომელსაც ორიგინალზე უკეთესს უწოდებდნენ. შეიძლება მართლაც უკეთესი იყო, ან შეიძლება ირონიულადაც მოიხსენიეს ასე, თუმცა აღსანიშნავი კია, რომ ჩინურ თაუერს ორის ნაცვლად ოთხი კოშკი აქვს.

თაუერის ასლი და ორიგინალი

ევროპული ქალაქების ჩინურ ასლებში სამოგზაუროდ წასვლა განსაკუთრებით პოპულარულია ახალდაქორწინებულ წყვილებში. ისინი ფოტოგრაფებთან ერთად დადიან ქალაქებში და ამაყად ამბობენ, რომ როცა ფოტოებს მეგობრებს აჩვენებენ, მათთან იტრაბახებენ, რომ თაფლობის თვე უცხოეთში გაატარეს.

კიდევ ერთი თვალშისაცემი მახასიათებელი: საჭმელი! ევროპულ ქალაქებში მაქსიმალურად ევროპულთან მიახლოებულ არქიტექტურას და გარემოს ქმნიან, მაგრამ ტურისტი პარიზში კროასანს და ჰალშტატში შნიცელს ვერ შეუკვეთავს. აქ არჩევანი არ არსებობს, ჩინურ სამზარეულოს ალტერნატივა არ აქვს.

ქვეყნის კომუნისტურ მთავრობას კარგა ხანია აღარ მოწონს ეს ახირებული წამოწყება. მთავრობაში მიიჩნევენ, რომ კოპირება არ ესადაგება სოციალიზმის ძირეულ ფასეულობებს და ქალაქებისთვის სახელების გადარქმევაზეც ფიქრობენ.

ავტორი: ლაშა ჩხაიძე