მსოფლიოში ოქრო იაფდება

რამდენიმე თვიანი ზრდის შემდეგ, მსოფლიო ბაზრებზე ოქროს ფასმა კლება დაიწყო.

დღეს, თბილისის დროით 12:00 საათისთვის, ბირჟებზე ერთი უნცია 3 222 დოლარი ღირს, რაც ერთთვიან ინტერვალში 85.6 დოლარით ნაკლებია. ერთდღიან ჭრილში კი თითქმის 7 დოლარით ნაკლები.

როგორც Reuters-ს კომპანია WisdomTree-ს ანალიტიკოსმა, ნიტეშ შაჰმა განუცხადა, დოლარის გამყარებამ და პეკინსა და ვაშინგტონს შორის სავაჭრო ომის დეესკალაციამ ოქროს, როგორც უსაფრთხო თავშესაფრად წოდებული აქტივის მოთხოვნას დარტყმა მიაყენა.

მისი შეფასებით, „მთელი კვირის განმავლობაში სავაჭრო მოლაპარაკებებთან დაკავშირებით დადებითი სიგნალები ისმოდა და დოლარის კურსი გამყარდა, რაც ოქროს ფასზე უარყოფითად მოქმედებს“.

კერძოდ, 12 მაისს აშშ-მა და ჩინეთმა განაცხადეს, რომ ერთმანეთისთვის ტარიფების შემცირებაზე შეთანხმებას მიაღწიეს, რამაც ფინანსურ ბაზრებზე განწყობა გააუმჯობესა. ამასთან, ანალიტიკოსები აშშ-ის ეკონომიკის მდგომარეობისა და ფედერალური რეზერვის მონეტარული პოლიტიკის შესაძლო ქმედებებზე დამატებით ინფორმაციას ელოდებიან. ისინი რეგულატორის წარმომადგენლების გამოსვლებს აკვირდებიან.

www.bpn.ge