მოძრაობა „სირცხვილიასთვის“ მიუღებელია „ქართული ოცნების“ მიერ წარდგენილი ინიციატივა საარჩევნო სისტემის შეცვლის საკითხზე. სოციალურ ქსელში გავრცელებულ განცხადებაში მოძრაობა აღნიშნავს, რომ იგი არ აპირებს „ქართულ ოცნებასთან“ ვაჭრობას და პროპორციულ საარჩევნო სისტემას ითხოვს:
„როგორც ჩანს, ქართულმა ოცნებამ ისევ ვერ გაიგო, რომ ჩვენ მათთან ვაჭრობას არ ვაპირებთ. ჩვენი მოთხოვნები და ღირებულებები თქვენს შემოგდებულ წინადადებებზე არ იყიდება. განსხვავებით თქვენგან, ჩვენ გაგვაჩნია პრინციპები, რომლებსაც არაფრის გამო არ შევიცვლით. უკან დახევას არ ვაპირებთ!
მთელი საერთაშორისო თანამეგობრობა, დამოუკიდებელი საერთაშორისო და ლოკალური არასამთავრობო ორგანიზაციები, საქართველოს მოქალაქეები (მათ შორის, თქვენი ამომრჩევლებიც) ვითხოვთ პროპორციულ საარჩევნო სისტემას. გვესმის, რომ ძალაუფლების გაზიარება და დათმობა გიჭირთ, მაგრამ მოგიწევთ. თუ გინდათ თქვენი მომავალი ამ ქვეყანას დაუკავშიროთ, მიიღეთ სრულად პროპორციული საარჩევნო სისტემა. სხვა შემთხვევაში, ჩვენ გავაგრძელებთ დაუღალავ და შეუვალ წინააღმდეგობას და გაიძულებთ უკან დახევას“, – აღნიშნულია „სირცხვილიას“ მიერ გავრცელებულ განცხადებაში.
www.radiotavisupleba.ge
Loading ...