''მოქალაქე ვარ და ბიუროში მიღებაზე ვიყავი '' – ''ქართული ოცნების'' მხარდამჭერი

  ”ევროპული საქართველოს” წევრებს, რომლებსაც დღეს ოზურგეთის მაჟორიტარი დეპუტატის. არჩილ თალაკვაძის ბიუროს კარზე ბოქლომის დადება სურდათ, წინააღმდეგობა  უხვად შეკრებილ  სამართალდამცავებთან ერთად ”ქართული ოცნების” მხარდამჭერებმაც გაუწიეს. ”ქართული ოცნების” წევრებმა და მხარდამჭერებმა ბიუროსთან მობილიზება მანამდე გააკეთეს, სანამ ”ევროპული საქართველოს” რამდენიმე წარმომადგენელი შენობასთან  მოვიდოდა. 

‘ქართული ოცნების” მხარდამჭერები ზაზა ცინცაძე და ბონდო ღლონტი აცხადებდნენ, რომ არჩილ თალაკვაძის ბიუროში მიღებაზე, პირად საქმესთან დაკავშირებით  მოვიდნენ. ”შემოვარდნენ ვიღაცები ბოქლომებით, რომელი პარტია იყო, აზრზე არ ვარ” – ამბობს ზაზა ცინცაძე.

აღსანიშნავია, რომ ბიუროსთან  ”ევროპული საქართველოს” ხუთიოდე წევრი მოვიდა, ბიუროსთან კი ”ქართული ოცნების” და სამართალდამცავების დიდი რაოდენობა დახვდათ შეკრებილი. რაც შეეხება სამართალდამცავებს, მათ დასაწყისში მცდელობა ჰქონდათ მუნიციპალიტეტის შენობაში ჟურნალისტები არ შეეშვათ, პოლიცია განსაკუთრებით ვიდეოკამერების შიგნით ყოფნას აპროტესტებდა.