რუსეთის ტერიტორიაზე უპილოტო საფრენი აპარატებით მორიგი შეტევა იყო – მოსკოვის და ბრიანსკის ოლქებზე. რუსული ტელეგრამ-არხების ცნობით, მოსკოვთან აფეთქებები გამთენიისას მოხდა.
დილის 6 საათისთვის, მოსკოვის ოლქის გუბერნატორმა ანდრეი ვორობიოვმა ტელეგრამ-არხზე გამოაქვეყნა ინფორმაცია, რომ საჰაერო თავდაცვის ძალებმა ორი უპილოტო საფრენი აპარატი მოიგერიეს კრასნოგორსკის და ჩასცის რაიონებში. გუბერნატორის თანახმად, აფეთქების ტალღამ კრასნოგორსკში ჩაამსხვრია საცხოვრებელი კორპუსის ფანჯრები, თუმცა, არავინ დაშავებულა.
კრემლის მიერ კონტროლირებული სააგენტო „რია-ნოვოსტი“ წერს, რომ მოსკოვის ოლქის კრასნოგორსკის რაიონში დაზიანებულია 25-სართულიანი სახლის ფასადი და ფანჯრები. ტელეგრამ-არხი Shot-ი იუწყება, რომ კრასნოგორსკში დრონი ჩამოაგდეს იმ რაიონში, სადაც მოსკოვის საოლქო მთავრობის შენობა მდებარეობს.
დრონებით შეტევის გამო რამდენიმე საათის განმავლობაში არ მუშაობდნენ მოსკოვის შერემეტიევოს, დომოდედოვოს და ვნუკოვოს აეროპორტები.
რუსეთის თავდაცვის სამინისტროს მიერ დილით გავრცელებული ინფორმაციით, გასულ ღამით, საჰაერო თავდაცვის ძალებმა მოსკოვის ოლქის ტერიტორიაზე გაანადგურეს 2 უპილოტო საფრენი აპარატი და რადიოელექტრონული ბრძოლის საშუალებებით 2 დრონი გააუვნებელყვეს ბრიანსკის ოლქშიც. თავდაცვის სამინისტრო ირწმუნება, რომ არავინ დაშავებულა. სხვა წყაროებით ეს ინფორმაცია ჯერჯერობით გადაუმოწმებელია.
რუსეთის თავდაცვის სამინისტრო დრონებით თავდასხმას უწოდებს „კიევის რეჟიმის მიერ ტერორისტული აქტის მცდელობას“.
ბოლო რამდენიმე თვეა გახშირდა რუსეთის ტერიტორიაზე, მათ შორის მოსკოვზე უპილოტო საფრენი აპარატებით შეტევა. კიევი ამ თავდასხმებთან კავშირს ოფიციალურად არც ადასტურებს და არც უარყოფს. ამასთან, უკრაინის ხელისუფლებაში არაერთხელ განაცხადეს, რომ რუსეთს მის მიერ გაჩაღებული ომი დაუბრუნდა.
Loading ...
