18 ნოემბერს პარლამენტის წინ აქციის დაშლის დროს დაკავებული 8 მოქალაქის ადვოკატს თბილისის საქალაქო სასამართლოს მოსამართლემ მტკიცებულებების წარსადგენად ორი საათი მისცა. ადვოკატები ერთ სამუშაო დღეს ითხოვდნენ, რადგან მათი თქმით დაკავებულებს არ გასაუბრებიან.
მოსამართლე აქციაზე დაკავებულების საქმეს დილიდან განიხილავს, ახლა კი ირაკლი ჩიხრაძის, ლევან გორგაძის, ხვიჩა ბიწაძის, რევაზ ნიჟარაძის, დავით ბერუაშვილის, პაატა მანჯგალაძის, ნოე ლაშხის და გოჩა მჟავანაძის საქმეს განიხილავს. დაკავებულების ადვოკატების ნაწილმა მოსამართლის აცილების შუამდგომლობა დააყენა.
მოსამართლე ვალერიან ფალიაშვილმა ამ პროცესამდე აქციაზე დაკავებული პირების ორი პროცესი ერთი და ორი საათით გადადო.
ამის პარალელურად სასამართლო გაიმართა ბათუმშიც. აჭარის მთავრობის შენობის პიკეტირებისას დაკავებული ოთხივე პირი ბათუმის საქალაქო სასამართლომ დამნაშავედ ცნო. მოსამართლემ მათ 1500-1500-ლარიანი ჯარიმები დააკისრა.
გუშინ სამართალდამცველებმა ადმინისტრაციული სამართალდარღვევის ფაქტზე 37 ადამიანი დააკავეს. მათ შორის მოძრაობის „სირცხვილია“ ორგანიზატორი გიგა მაქარაშვილი და ზურაბ ბერძენიშვილი.
ადგილზე შეკრებილები არიან დაკავებულების ახლობლები და პოლიტიკური პარტიების წარმომადგენლები.
imedinews.ge
Loading ...
