გრილი მაისს-ივნისის შემდეგ ცხელი დღეებიც დაიწყო. მეტეოროლოგიური სამსახურის მონაცემებით, მომავალი 10 დღე თბილისში 35-38 გრადუსი სიცხე იქნება, თელავში – 33-38 გრადუსი, 30-34 – ქუთაისში, 34-38 – რუსთავში.
„16-17 ივლისს დასავლეთ საქართველოში რამდენიმე გრადუსით დაიკლებს ტემპერატურა, მაგრამ აღმოსავლეთში მაინც სიცხე შენარჩუნდება. დახუთულობაა და იმაზე მეტად გრძნობ სიცხეს, ვიდრე რეალურად არის“ , – ამბობს დოდო გვაზავა, გარემოს ეროვნული სააგენტოს მოკლევადიანი პროგნოზების განყოფილების უფროსი.
მაღალი ტემპერატურა ყველაზე მეტად მოქმედებს მოხუცებზე, ავადმყოფებსა და ბავშვებზე.
სიცხის დროს მნიშვნელოვანია სიგრილის შენარჩუნება, განსაკუთრებით ქალაქში. თუმცა, „კავკასიის ბარომეტრის“ 2024 წლის კვლევის თანახმად, საქართველოს მოსახლეობის მხოლოდ 21 პროცენტს აქვს სახლში კონდიციონერი.
არსებობს სიცხისგან დამცავი სხვა საშუალებიც:
- დახურეთ ფანჯრები, ჟალუზები, ჩამოაფარეთ ფარდები.
- ჩამოკიდეთ სველი პირსახოცები. ეს გაგრილებასთან ერთად სახლს დაატენიანებს.
- დალიეთ ბევრი სითხე (ოღონდ არა ტკბილი სასმელები და ალკოჰოლი).
- ატარეთ ნატურალური მასალის, ღია ფერის, თავისუფალი ტანსაცმელი. დაიხურეთ ქუდი ან დაიკავეთ ქოლგა. გაიკეთეთ სათვალე.
- წაისვით მზისგან დამცავი კრემი სახესა და სხეულზე.
- მოამზადეთ მსუბუქი საჭმელები, ისეთი, რომელიც ღუმელთან დგომას არ საჭიროებს.
- ღამით ფანჯარა ღია დატოვეთ.
Loading ...