მოსალოდნელია თუ არა საქართველოში კორონავირუსის ახალი ტალღები – გამყრელიძის მოსაზრება

თუ ჩვენ აცრის მოცვის მაჩვენებელი ვერ ავწიეთ, ჩვენ ყოველ ორ თვეში ამ ტიპის და უფრო მძაფრი ტალღები გვექნება, – ამის შესახებ საზოგადოებრივი მაუწყებლის ეთერში დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.

მისივე თქმით, ნოემბერი იქნება საკმაოდ რთული ეპიდვითარების კუთხით.

„შეიძლება ბევრს ჩემი წინასწარმეტყველება არ მოეწონოს, მაგრამ სამწუხაროდ მეხუთე ტალღა ძალიან მაღალი ნიშნულიდან დავიწყეთ. ამ ნიშნულით არ დაწყებულა არც მეორე, არც მესამე და არც მეოთხე ტალღები. ახლა უფრო მძაფრად მიდის პანდემია, დელტა შტამი საკმაოდ აგრესიული გამოდგა“, – განაცხადა გამყრელიძემ.

მან ასევე კიდევ ერთხელ აღნიშნა, რომ ნოემბერში მოსალოდნელია გრიპის და სხვა რესპირაციული ვირუსების ცირკულაცია, რაც ვითარებას კიდევ უფრო გაართულებს.

„რთული იქნება დიაგნოსტიკა, ვინაიდან მათი კლინიკური სურათი ჰგავს კოვიდს, მაქსიმალურად უნდა გავზარდოთ ტესტირების მაჩვენებელი, რომ მოხდეს დიფერენციაცია. უკვე დაიწყო გრიპის საწინააღმდეგო ვაქცინაცია, ჯერ მხოლოდ სამ რისკჯგუფზე და შემდეგ გაფართოვდება სხვა რისკ ჯგუფებზეც“, – განაცხადა გამყრელიძემ.

მისივე თქმით, მას არ ჰგონია, რომ გრიპის სეზონი წელს ისეთივე მსუბუქი იქნება, როგორც გასულ წელს იყო.