მნიშვნელოვანი ინფორმაცია მათთვის ვისაც ბანკში სესხის აღება სურს! – ცვლილებები ძალაში აგვისტოდან შედის

კერძოდ, საქართველოს მოქალაქე, რომელსაც შემოსავალი ლარში ერიცხება, ბანკებიდან უცხოურ ვალუტაში ფულს ვერ ისესხებს, თუ 750 000 ლარის ეკვივალენტზე ნაკლები თანხა სჭირდება.

ამჟამად, 2025 წლის 1 იანვრიდან, მოქმედებს 500 000-ლარიანი მინიმალური დანაწესი.

• უცხოურ ვალუტაში სესხის აღებაზე შეზღუდვების დაწესება 2017 წლის 20 იანვრიდან დაიწყო. თავდაპირველად ლიმიტი 100 000 ლარი იყო;
• 2019 წლის 23 იანვრიდან 200 000 ლარამდე გაიზარდა;
• მოგვიანებით ზღვარი 400 000 ლარზე, 2025 წლიდან კი – 500 000 ლარზე დაწესდა.

ევროსა და დოლარში გაცემულ სესხებზე ბანკებში, ლართან შედარებით, უფრო დაბალი საპროცენტო განაკვეთია.

თუკი იპოთეკურ სესხებზე წლიური ეფექტური საპროცენტო განაკვეთი ეროვნულ ვალუტაში 15 პროცენტიდან იწყება, დოლარის შემთხვევაში ეს რიცხვი 1,5-ჯერ ნაკლებია (10 პროცენტიდან), ევროს შემთხვევაში კი – თითქმის ნახევარი (8 პროცენტიდან). საბოლოო პირობები ბანკსა და კლიენტს შორის ინდივიდუალური კომუნიკაციით დგინდება.

თუ სესხის აღების მომენტიდან დაფარვამდე ეროვნული ვალუტის კურსი მცირედით შეიცვლება, უცხოურ ვალუტაში სესხის აღება უფრო მომგებიანი გამოდის. თუმცა არსებობს რისკებიც, როგორც ეს წლების წინ მოხდა: თუ ეროვნული ვალუტა მკვეთრად გაუფასურდება, ლარში იზრდება ყოველთვიურად გადასახდელი თანხის ოდენობა.

აღნიშნული გადაწყვეტილება მიიღეს ეროვნული ბანკის ფინანსური სტაბილურობის კომიტეტის სხდომაზე, რომელიც 27 მაისს ჩატარდა. ცვლილება ძალაში 2025 წლის 1 აგვისტოდან შევა.

20 დღით ადრე, 7 მაისს, ეროვნული ბანკის მონეტარული პოლიტიკის კომიტეტმა მონეტარული პოლიტიკის განაკვეთის (იგივე რეფინანსირების განაკვეთის) უცვლელად დატოვების გადაწყვეტილება მიიღო და 8 პროცენტზე დატოვა.

ინფლაციის მიზნობრივი მაჩვენებელი 3 პროცენტია, აპრილის მდგომარეობით კი წლიურმა ინფლაციამ 3,4 პროცენტი შეადგინა.

მონეტარული პოლიტიკის კომიტეტის ბოლო, 7 მაისის მოხსენების თანახმად, „გლობალურად არსებული ეკონომიკური გაურკვევლობის ფონზე, ინფლაციაზე როგორც ზრდის, ისე კლების მიმართულებით მოქმედი რისკები გამოიკვეთა“.