მკვლელობაში ბრალდებულის მამა: – ”იყო სახლში და წყნარად ცხოვრობდა”

ოზურგეთში დღეს 53 წლის მამაკაცის დაჭრასთან დაკავშირებით სხვადასხვა ვერსია ვრცელდება. ერთი ვერსიით, მას თავს რამდენიმე დღის წინ მოკლული 23 წლის გიგა როყვას  ახლობლები დაესხნენ და მისი მოკვლა სცადეს, რადგან დაჭრილი მამაკაცი დემურ გოგოტიშვილი აღნიშნულ მკვლელობაში ბრალდებულის ვაჟა გოგოტიშვილის ბიძაა.  თუმცა მეორე ვერსიით და ასევე, ოჯახის განცხადებით, 53 წლის დემურ გოგოტიშვილმა თვითდაზიანებები სამართებლით თავად მიიყენა და ამის ჩადენამდე წერილიც დატოვა.

დემურ გოგოტიშვილის ძმა, რომელიც ამავე დროს მკვლელობაში ბრალდებულის მამაა, შურისძიებას ვერსიას გამორიცხავს. ბეჟან გოგოტიშვილი ამბობს, რომ ძმა კლინიკაში თავად გადაიყვანა, წერილიც მანვე იპოვა და დარწმუნებულია, რომ დაზიანებები მისმა ძმამ თავად მიიყენა. თუმცა აღნიშნულის ჩადენის მოტივი მისთვის უცნობია. ბეჟან გოგოტიშვილი უარყოფს იმ ვერსიასაც, რომლის მიხედვითაც მის შვილს მოკლულ გიგა როყვასთან წარსულში უთანხმოება ჰქონდა. გოგიტიშვილის განცხადებით, მისი ვაჟი მშვიდად ცხოვრობდა და კონფლიქტი არავისთან ჰქონია.

დაჭრილი მამაკაცი ამ დრომდე კლინიკა ”მედალფაში”  იმყოფება. მიუხედავად მრავლობითი დაზიანებებისა, მის სიცოცხლეს საფრთხე აღარ ემუქრება. როგორც ცნობილია, მას დაზიანებები საწოლში ჰქონდა მიყენებული და ამ მდგომარეობაში ის ოჯახის წევრმა იპოვა.