“მიხეილ სააკაშვილის წონა 58 კილოგრამზე ჩამოვიდა”-გიული ალასანია

ექსპრეზიდენტ მიხეილ სააკაშვილის დედის, გიული ალასანიას განცხადებით, სააკაშვილის წონა 58 კილოგრამზეა ჩამოსული.

გიული ალასანიას თქმით, მიხეილ სააკაშვილი იმიტომ ვერ იღებს „ვივამედის“ ექიმების მიერ რეკომენდებულ დღიურ 1500 კალორიას, რომ მოწამლულია და ვერ იკვებება.

მისივე თქმით, აქვს ინფორმაცია, რომ სააკაშვილის მკურნალობის პროცესში ჩართვა შესთავაზეს ელენე გიორგაძეს, რომელმაც გიული ალასანიას თქმით, ჯერ კიდევ გორის ჰოსპიტალში მიხეილ სააკაშვილს კვების ისეთი გეგმა შეუდგინა, რომელმაც მისი ჯანმრთელობის მდგომარეობის გაუარესება გამოიწვია.

„მე რამდენადაც ვიცი, ელენე გიორგაძეს შესთავაზეს მოსვლა. ეს ის ქალბატონია, რომელიც გორის სამხედრო ჰოსპიტალში ხელმძღვანელობდა მის კვებას, რომელიც ყველამ დაიწუნა და ჩათვალეს, რომ მისი ასეთი ჯანმრთელობის მდგომარეობის ერთ-ერთი მიზეზი იყო სწორედ ეს „რეფიდინგი“, რომელიც ჩაუტარდა იქ და ამიტომ არის ეს უარი“, – განუცხადა ალასანიამ ტელეკომპანია „მთავარს“.